"ისეთი ხალხი შეიწყალა, რომ როგორ შეიძლება რაიმე სახის მოულოდნელობა გამოვრიცხოთ სააკაშვილისგან?!"- ამის შესახებ სასჯელაღსრულების, პრობაციის და იურიდიული დახმარების საკითხთა მინისტრმა სოზარ სუბარმა TV-3-ის გადაცემა "დიდი პოლიტიკის" ეთერში ისაუბრა.
სუბარის განცხადებით, აღნიშნულ საქმეებზე გადაწყვეტილებების მიმღები ყველა მოსამართლე, ხელისუფლებაში მიხეილ სააკაშვილის გუნდის ყოფნის დროსაა არჩეული და შესაძლოა, ამ ფაქტმა რიგ საქმეებზე განაჩენის გამოტანისას გარკვეული როლი ითამაშოს.
სასჯელაღსრულების მინისტრი მიხეილ სააკაშვილის მიერ ახლო წარსულში განხორციელებულ შეწყალებებსაც იხსენებს და ამის მაგალითად სამეგრელო-ზემო სვანეთის მხარეში პრეზიდენტის რწმუნებულის, თენგიზ გუნავას წინააღმდეგ აღძრული სისხლის სამართლის საქმე მოჰყავს, რომელშიც გუნავა დამნაშავედ იქნა ცნობილი, პატიმრობა მიესაჯა, თუმცა პატიმრობის მისჯიდან რამდენიმე დღეში იგი პრეზიდენტმა შეიწყალა და კვლავ გუბერნატორის პოსტზე დანიშნა.
რაც შეეხება შინაგან საქმეთა სამინისტროს მიერ გამოთქმულ შეშფოთებას მიხეილ სააკაშვილის მიერ განხორციელებულ შეწყალების აქტთან დაკავშირებით, სუბარის თქმით, შსს-ს მსგავსი რეაქცია მხოლოდ იმიტომ ჰქონდა, რომ როდესაც დამნაშავეს დანაშაული უმტკიცდება, მან სათანადოდ უნდა აგოს პასუხი და არა - გათავისუფლდეს. ამასთან, მინისტრი თვლის, რომ პრეზიდენტის მიერ შეწყალებული პირები საზოგადოებრივ წესრიგს მნიშვნელოვან საფრთხეს ვერ შეუქმნიან და შინაგან საქმეთა სამინისტროს რეაქცია ამის გამო არ ყოფილა განპირობებული.
"მართლმსაჯულების და ხალხის დაცინვაა, რა შეწყალებებიც ბოლო პერიოდში განახორციელა მიხეილ სააკაშვილმა. უკიდურესად შეძრწუნებული ვართ ხელისუფლებაც და საზოგადოებაც ჯერ კიდევ პრეზიდენტის უპასუხისმგებლო ქცევებით და ქმედებებით, თორემ ამით საზოგადოებრივ წესრიგს განსაკუთრებული საფრთხე ვერ შეექმნება, იმიტომ, რომ მიუხედავად უპრეცედენტო ამნისტიისა, დღეს გაცილებით ნაკლები დანაშაული ხდება და თითქმის 2.5-ჯერ მეტითაა გახსნის მაჩვენებელი გაზრდილი,"- განაცხადა სოზარ სუბარმა.