საგარეო უწყების ხელმძღვანელმა მაია ფანჯიკიძემ ისრაელთან სავიზო რეჟიმის გაუქმება შეაფასა და აღნიშნა, რომ დაახლოებით ერთ კვირაში დიპლომატიური და სამსახურებრივი პასპორტების მქონე პირები უვიზოდ მიმოსვლას შეძლებენ.
მისივე განმარტებით, უვიზო მიმოსვლასთან დაკავშირებით დეტალური ინფორმაცია საგარეო საქმეთა სამინისტროს ვებგვერდზე განთავსდება.
,,ჩვენ ისრაელთან სავიზო რეჟიმი ცალმხრივად გაუქმებული გვქონდა. ახლა უკვე ისრაელის სახელმწიფო გამოთქვამს მზადყოფნას, ოღონდ ეს არ ნიშნავს იმას, რომ საქართველოს მოქალაქეებს ისრაელში უვიზოდ წასვლა უკვე ხვალიდან შეეძლებათ. ეს ნიშნავს მოლაპარაკებების დაწყებას. პირველი ნაბიჯი ამ გზაზე უკვე გადადგმულია. ძალიან მალე შევა ძალაში დიპლომატიური პასპორტების უვიზო მიმოსვლა, შემდეგ კი დაიწყება მოლაპარაკება იმისთვის, რომ ამ რეჟიმით ჩვეულებრივი პასპორტების მფლობელებმაც ისარგებლონ. ეს რამდენიმეთვიანი პროცესია, ჩვენ მოლაპარაკებებს დღესვე ვიწყებთ და მოქალაქეებს რამდენიმე თვეში შესაძლებლობა ექნება ისრაელში უვიზოდ წასვლის. რაც შეეხება დიპლომატიური პასპორტის მფლობელებს, შეთანხმება უკვე ხელმოწერილია და ძალაში ალბათ, ერთ კვირაში შევა. ეს ჩემმა კოლეგამ დამიდასტურა", - განაცხადა ფანჯიკიძემ.
