საქართველოს ოფიციალური ვიზიტით მყოფი ისრაელის სახელმწიფოს საგარეო საქმეთა მინისტრის მოადგილე, მინისტრის მოვალეობის შემსრულებელის ზეევ ელკინის განაცხადებით დავით კეზერაშვილის საქმე პოლიტიკის თემა არ უნდა გახდეს. როგორც ,,რუსთავი-2"-თან საუბარში ელკინმა განაცხადა თავდაცვის ყოფილი მინისტრის საქართველოში ჩამოყვანა საფრანგეთისა და საქართველოს საქმეა.
,,დავით კეზერაშვილის საქართველოში ჩამოყვანას რაც შეეხება ეს უნდა დარჩეს სასამართლო სისტემის ფარგლებში და ეს არ უნდა გახდეს პოლიტიკის თემა. დავით კეზერაშვილის საქართველოში ჩამოყვანა საფრანგეთისა საქართველოს საქმეა. ის არ ეხება ისრაელის სასამართლო სისტემას", _განაცხადა ზეევ ელკინმა.
შეგახსენებთ, რომ თავდაცვის ყოფილი მინისტრი დავით კეზერაშვილი ფრანგმა სამართალდამცავებმა 14 ოქტომბერს დააკავეს. მას საფრანგეთის სასამართლომ 40 დღიანი პატიმრობა შეუფარდა.
თავდაცვის ყოფილ მინისტრს ბრალად საქართველოს სისხლის სამართლის კოდექსის რამდენიმე მუხლით გათვალისწინებული დანაშაულის ჩადნა ედება, მათ შორისაა სახელმწიფო პოლიტიკური პირის მიერ განსაკუთრებით დიდი ოდენობის ქრთამის აღება. ბრალდებებს არ ეთანხმება კეზერაშვილის ადვოკატი. მისი თქმით, ბრალდების მხარის მიერ წარმოდგენილი არგუმენტები აბსურდული და პოლიტიკურად მოტივირებულია. საქართველოს მთავარმა პროკურატურამ თავდაცვის ყოფილი მინისტრის დავით კეზერაშვილის ექსტრადირებისთვის საჭირო დოკუმენტაცია უკვე გადაუგზავნა საფრანგეთის იუსტიციის სამინისტროს.
