მთავრობამ თვითმმართველობის კოდექსი დაამტკიცა, რომელიც საბოლოო განხილვისთვის და დამტკიცებისთვის საკანონმდებლო ორგანოს გადაეგზავნება. როგორც რეგიონული განვითარებისა და ინფასტრუქტურის სამინისტროში განმარტავენ, კოდექსის მიხედვით მთავარი თვითმმართველი ქალაქების რაოდენობა იზრდება და ნაცვლად დღეს არსებული 5 თვითმმართველი ქალაქისა, (თბილისი, რუსთავი, ქუთასისი, ფოთი, ბათუმი) ეს სტატუსი მიენიჭება იმ ქალაქებსაც, სადაც მოსახლეობის რაოდენობა 15 ათასზე მეტია. მაგალითად, ისეთ ქალაქებს, როგორიცაა გორი, ზუგდიდი, ოზურგეთი და სხვა.
როგორც სამინისტროში განმარტავენ, თვითმმართველი ქალაქების მიმდებარე სოფლებისგან ჩამოყალიბდება თემები, რომლის ბაზაზეც ფორმირდება მუნიციპალიტეტი. თვითმმართველი ერთეულების (ქალაქებისა და მუნიციპალიტეტების) მმართველი რგოლი არჩევითი იქნება.
კოდექსით განსაზღვრულია ასევე სოფლებში საზოგადოებრივი საბჭოების შექმნა, რაც სოფელში მცხოვრებთა რეალური საწიროებების გამოვლენას და მათ გადაწყვეტას შეუწყობს ხელს.
მეორე საკითხი, რასაც თვითმმართველობის კოდექსი არეგულირებს, არის ის რომ გუბერნატორის ინსტიტუტის პარალელურად შეიქმნება კოლეგიალური ორგანო, რომელშიც წარმოდგენილი იქნებიან საკრებულოს წევრები. ეს ორგანო ჩართული იქნება გადაწყვეტილების მიღების პროცესში.
მასალის გამოყენების პირობები