არაბეთის გაერთიანებული საემიროების, ,,რას ალ ხაიმას" მმართველი გიორგი მარგველაშვილს საპრეზიდენტო არჩევნებში გამარჯვებას ულოცავს. შეიხ საუდ ბინ საქრ ალ ქასიმისის მილოცვაში ნათქვამია, რომ ის უახლოეს პერიოდში მოელის, რომ საქართველოსა და ,,რას ალ ხაიმას" შორის ურთიერთობები კიდევ უფრო გაღრმავდება.
„თქვენო აღმატებულებავ, მინდა გულწრფელად მოგილოცოთ საქართველოს საპრეზიდენტო არჩევნებში გამარჯვება. არჩევნების შედეგები მიუთითებს იმაზე, რომ მოსახლეობა თქვენს ლიდერულ თვისებებს და „ქართული ოცნების" ხედვას ქვეყნის განვითარებასთან დაკავშირებით, იზიარებს"- აცხადებს შეიხი.
საუდ ბინ საქრ ალ ქასიმი გიორგი მარგველაშვილს წარმატებულ ინაუგურაციას და საპრეზიდენტო ვადის პროდუქტიულად დაწყებას უსურვებს.
შეგახსენებთ, რომ „რას ალ ხაიმას" მმართველი საქართველოს ბოლოს, სექტემბრის პირველ ნახევარში სტუმრობდა. როგორც ცნობილია, პრემიერ-მინისტრმა ბიძინა ივანიშვილმა შეიხ საუდ ბინ საქრ ალ ქასიმისსა და მის ბიზნეს ჯგუფს უმასპინძლა.
"სტუმრებმა თავიანთი პრობლემები გაგვაცნეს, რაც წინა ხელისუფლების პირობებში მათ ბიზნესს შეექმნა საქართველოში. ეს არის ერთი კონკრეტული მაგალითი იმ უსამართლობის, რაც ქვეყანაში ხდებოდა. ამიერიდან არც ერთი ინვესტორი არ უნდა დაზარალდეს. ჩვენ აღვადგენთ კავშირებს მხოლოდ ნდობით, მხოლოდ სწორი ქცევით და მოვახერხებთ, რომ შეიხი არა მხოლოდ ინვესტორი, არამედ დიდი მეგობარიც გახდეს ჩვენი ქვეყნის",-განაცხადა შეიხთან შეხვედრის შემდეგ ბიძინა ივანიშვილმა.
