„სააკაშვილის შესაძლო დაპატიმრება საქართველოს რუსეთის ორბიტისკენ უბიძგებს" ამ სათაურით აქვეყნებს სტატიას „The Financial Times"-ი. რომელშიც წერს, რომ შესაძლოა საქართველოსა და ევროკავშირს შორის თავისუფალი ვაჭრობის შესახებ პოლიტიკური შეთანხმების ხელმოწერა გადაიდოს და საქართველო საბაჟო კავშირში გაწევრიანდეს.
„საქართველო 10 წელიწადში დაშლის პირას მდგარი სახელმწიფოსგან ნორმალურ, მუშა და მზარდ ახალგაზრდა დემოკრატიად იქცა. ახლა კი წარმოიქმნა რისკები - ეს სააკაშვილი შესაძლო დაპატიმრებაა. მის მაღალჩინოსნებს უკვე წარუდგინეს ბრალი კორუფციაში - პოლიტიკურად მოტივირებული, როგორც ამას თავად განსასჯელები აცხადებენ", _ წერს ჟურნალისტი ნილ ბაკლი.
სტატიაში ნათქვამია, რომ პრემიერი ივანიშვილი არაერთგვაროვან გზავნილებს აკეთებს სააკაშვილთან დაკავშირებით.
„ის დისტანცირებას ახდენს წინა პრეზიდენტთან დაკავშირებულ ნებისმიერ სისხლის სამართლის საქმისგან, მაგრამ იმეორებს, რომ გამოძიება გამორიცხული არ არის. მას ან იმის თქმა უნდა, რომ სააკაშვილის ბედი - პატიმრობა, სასამართლო, ციხე - უკვე გადაწყვეტილია, ან ცდილობს აიძულოს სააკაშვილი ემიგრაციაში წავიდეს", _ ნათქვამია სტატიაში და იქვე აღნიშნულია, რომ სააკაშვილის დაპატიმრება იქნება „დარტყმა არა მხოლოდ საქართველოსთვის, არამედ იმედებისათვის დემოკრატიაზე მთელს პოსტსაბჭოთა სივრცეში" და სავარაუდოდ, ევრპოკავშირთან ვაჭრობისა და პოლიტიკური შეთანხმების გაფორმება გადაიდება, მიუხედავად იმისა, რომ ეს შეთანხმება ძალიან მნიშვნელოვანია საქართველოსათვის.
„თუ არ იქნება შეთანხმება ევროკავშირთან, საქართველოს არ დარჩება სხვა გზა, გარდა იმისა, რომ რუსეთთან კავშირების აღდგენაზე იფიქროს. შესაძლოა საქართველო საბაჟო კავშირშიც გაწევრიანდეს", _ წერს გაზეთი.