საქართველოს პრემიერ-მინისტრის ბიძინა ივანიშვილის განცხადებით, რიყის ამფითეატრის სამომავლო ბედის გადასაწყვეტად მთავრობა საზოგადოებასთან კონსულტაციებს გამართავს.
როგორც ივანიშვილმა "ჯი-ეიჩ-ენის" მიერ დასმული კითხვის საპასუხოდ აღნიშნა, თანამედროვე ხელოვნებაში ძალიან ბევრია გაურკვევლობის ნიმუშები და ზოგიერთ ქართველს თანამედროვე ხელოვნება ჰგონია თუ რამე გაურკვეველი და გაუგებარია, მაგრამ ასე არ არის.
ამასთან, ივანიშვილის თქმით, აღნიშნული პროექტის განხორციელება მას სურდა, თუმცა მაკეტის გაცნობის შემდეგ დარწმუნდა, რომ უინტერესო პროექტია და მოცემულ სიტუაციაში მისი იერსახის შედარებით მიმზიდველად გადაქცევა მხოლოდ იმ შემთხვევაში იქნება შესაძლებელი, თუ კონსტრუქციის ზედაპირი მწვანე საფარით დაიფარება.
რაც შეეხება რიყის ამფითეატრის დემონტაჟის საკითხს, საქართველოს პრემიერ-მინისტრის მტკიცებით, აღნიშნული გადაწყვეტილება ან კონსტრუქციის სხვა ადგილზე გადატანა ძალიან სერიოზულ სამუშაოებს საჭიროებს, რაც ქვეყნის ბიუჯეტისთვის საკმაოდ ძვირადღირებული სიამოვნებაა.
"სხვათა შორის ამ ბოლო დროს ყველაზე მეტად პატრიარქი ინტერესდება რიყის ამფიტეატრის საკითხით, აქამდე მე ვაქცევდი ძალიან დიდ ყურადღებას და ყველა ბოლო შეხვედრაზე პატრიარქი მახსენებს. თითქოს მეორეხარისხოვან საკითხად გადაიქცა, ვეღარ მოვიცალეთ მაგისთვის. უნდა ვიმსჯელოთ, საზოგადოებასთან ერთად გამოვიტანთ სამსჯელოზე ჩვენ ალბათ. ჩემი აზრით, დღესაც ვამბობ, რომ აბსოლუტურად გაუგებარი არქიტექტურაა თუ მაგას არქიტექტურა ჰქვია. შეიძლება მაგათ თანამედროვე ხელოვნებისთვის ყური მოუკრავთ, ძალიან რთულია თანამედროვე ხელოვნება გასაგებად. რამდენიმე წელიწადი ვსწავლობდი მე არ დაგიმალავთ და რაც უფრო ღრმად მივდიოდი, უფრო კარგად გავიგე, რომ ძალიან რთულია იქ გარკვევა. ბევრი ექსპერტი და თვითონ ნახატის მეპატრონეებიც ძლივს ერკვევიან. მე მგონი, ასეთ დატვირთვას თუ მივცემთ ამა, თანამედროვე ხელოვნებაში ძალიან ბევრია ნიმუშები გაურკვევლობის და ზოგიერთ ქართველს თანამედროვე ხელოვნება ჰგონია თუ რამე გაურკვეველი და გაუგებარია, მაგრამ ასე არ არის. რეალური ხელოვნება რაც იქმნება, იქ რა თქმა უნდა, კონცეპტუალური ძალიან ღმა და დიდი აზრია ჩადებული და რიყის ამფითეატრში არაფერი არაა. ის უნდოდათ რომ ყოფილიყო ღვინის ჭურჭელი, ღვინის ქვეყანა ვართ ჩვენო მიპასუხეს როდესაც მაგას ვაკრიტიკებდი. ის უფრო კოსმოსიდან გავს სურას. მაგის გაკეთება მე მინდოდა, თუ სიმწვანით დავფარავთ, შეიძლება იოლად ასატანი იყოს, იმიტომ რომ მაგის გადატანა ძვირი იქნება, ფული დაჯდება მაგის გადატანა და ეგ რომ გადავიტანოთ ან დავშალოთ, ბიუჯეტიდან რამდენიმე მილიონი დასჭირდება, ესაა პრობლემა. ისევე, როგორც პარლამენტის შენობა ვერაფერს ვერ მივუადაგეთ იმდენად რთული გამოყენებადია ის რაც გააკეთეს. და ის, რიყეზე რაც არის, ესაა ნონსენსი პრინციპში და კარგად გამოხატავს ერთ რამეს: სააკაშვილმა განაცხადა, რომ თუ არ იქნებოდა პოლიტიკოსი, იქნებოდა არქიტექტორი. ჩემი აზრით, აბსოლუტურად შეატყვისობაში მოდის მისი არქიტექტურული გემოვნება და პოლიტიკურიც, და ეს არის ამის ძალიან კარგი ნიმუში,"- განაცხადა ბიძინა ივანიშვილმა.
