კოალიცია "ქართული ოცნების" საპრეზიდენტო კანდიდატი გიორგი მარგევალშვილი მიიჩნევს, რომ საკანონმდებლო და აღმასრულებელი ხელისუფლება ერთ ქალაქში უნდა ფუნქციონირებდეს.
როგორც მარგველაშვილმა "ჯი-ეიჩ-ენის" დასმული კითხვის საპასუხოდ აღნიშნა, პარლამენტის ქუთაისში მდებარეობით უაღრესად რთულდება კომუნიკაცია მთავრობის წევრებს და დეპუტატებს შორის, რის გამოც, ხშირ შემთხვევაში მუშაობა სათანადო ხარისხის არ არის.
"იმასთან დაკავშირებით, უნდა იყოს თუ არა ერთ დედაქალაქში თავმოყრილი ხელისუფლების სხვადასხვა შტოები, ჩემი შეხედულებით, ეს არის სწორი გზა. იმიტომ, რომ უაღრესად რთულდება ურთიერთობები თუნდაც პარლამენტსა და აღმასრულებელ ხელისუფლებას შორის. მე, როგორც ყოფილი მინისტრი მოგახსენებთ, რომ ძალიან რთული იყო ბევრი საკითხის მოგვარება და შინაარსობრივად კარგად გავლა როდესაც ორ ადამიანს შესახვედრად იქეთ- აქეთ ცალ-ცალკე 3 საათიანი სამანქანო გზა სჭირდება. აქედან გამომდინარე, მე მგონია, რომ ერთ ქალაქში უნდა იყოს. ყოველ შემთხვევაში, როგორც ყოფილი მინისტრი ვაცხადებ, რომ დეპუტატებთან ურთიერთობა მნიშვნელოვანი იყო და ვერ ვახერხებდი ამას,"- განაცხადა გიორგი მარგველაშვილმა.
რაც შეეხება სხვადასხვა სახელმწიფო უწყებების რეგიონებში გადანაწილების და ხელისუფლების შტოების დეცენტრალიზაციის გავლენას რეგიონების ეკონომიკურ და სოციალურ განვითარებაზე, მარგველაშვილი თვლის, რომ საბიუჯეტო ხარჯებზე აგებული ეკონომიკა რეალურად, რეგიონალური განვითარების და ეკონომიკური განვითარების ფუნდამენტს არ წარმოადგენს.
"ჩვენ ბევრჯერ გვითქვამს, რომ საქართველოში იყო აბსოლუტურად არარეალური ეკონომიკა. ეს ბევრი პარამეტრით გამოიხატება და აღიწერება, მაგრამ ერთ-ერთი ყველაზე მთავარი პარამეტრი არის ის, რომ ქართული ეკონომიკის ლომის წილი მოდიოდა საბიუჯეტო ხარჯებზე. ამ საბიუჯეტო ხარჯებზე აღებული ეკონომიკა რეალურად რეგიონალური განვითარების და ეკონომიკური განვითარების ფუნდამენტს ხედავდა იმაში, სად რომელი სახელმწიფო უწყება იქნება განთავსებული. თავისთავად რეგიონალური განვითარება რომ ჩვენთვის უმთავრესი პრიორიტეტია, ეს აჩვენა თუნდაც 2013-მა წელმა, ისეთი უპრეცედენტო ინფრასტრუქტურული პროექტები განახორცელა ჩვენმა კოლეგა დავით ნარმანიამ, ასევე უპრეცედენტო სოფლის მეურნეობის პროექტი განახორციელა ახალმა მთავრობამ. ეს არის რეალურად რეგიონალური ეკონომიკის ზრდა,"- აღნიშნა მარგველაშვილმა.