ცენტრალურმა საარჩევნო კომისიამ საზოგადოებას საზღვარგარეთ შექმნილ უბნებზე ამომრჩეველთა აქტივობის შესახებ წარუდგინა ინფორმაცია.

როგორც ცესკოს სპიკერმა ეკატერინე აზარაშვილმა საინფორმაციო ბრიფინგზე განაცხადა, 27 ოქტომბერს საბოლოო აქტივობამ 7,5 % შეადგინა, სულ საზღვარგარეთ 3,634-მა ამომრჩეველმა მიიღო კენჭისყრაში მონაწილეობა.

"აქტივობა საკმაოდ დაბალია, თუ შევადარებთ 2012 წლის პარლამენტის არჩევნებს, - რამაც გასულ წელს საზღვარგარეთ 18 % შეადგინა; ამ დროისთვის პრეზიდენტის არჩევნებისთვის სხვა სახელმწიფოებში შექმნილი 50 უბნიდან 40 უბნის შედეგია დათვლილი," აღნიშნა ეკატერინე აზარაშვილმა ჟურნალისტებთან საუბრისას.

მან მედიას ასევე გააცნო ინფორმაცია საარჩევნო ადმინისტრაციაში შემოსულ საჩივრებთან დაკავშირებით - "ცესკოში სულ სამი საჩივარი შემოვიდა. აქედან ორი "დემოკრატიული მოძრაობა-ერთიანი საქართველოს" საჩივარია და ორივე სააგიტაციო მასალებთან დაკავშირებულ დარღვევებს ეხება; ორგანიზაციამ "მწვანე დედამიწა" კენჭისყრის კაბინაში ფოტო-ვიდეო გადაღების წესების დარღვევასთან დაკავშირებით მოგვმართა. დღეს ცესკოში სხდომა გაიმართება სადაც იმსჯელებენ ზემოაღნიშნულ საჩივრებზე და კომისია შესაბამის გადაწყვეტილებასაც მიიღებს.

რაც შეეხება საარჩევნო უბნებზე არსებულ საჩივრებს, საოლქო საარჩევნო კომისიებში 3 დღიანი გასაჩივრების ვადაა. შესაბამისად, ჩვენ უახლოეს პერიოდში გვექნება სრული სტატისტიკა თუ რამდენი საჩივარი შევიდა ამა თუ იმ ოლქში, რა საკითხებზე და ა.შ. თუმცაღა, უკვე შემიძლია გითხრათ, რომ უბნებზე შესული საჩივრები ძირითადად პროცედურულ დარღვევებს შეეხება," განაცხადა ეკატერინე აზარაშვილმა.