"რაზეც ლაპარაკი იყო, რომ მაღალი მიღწევები იყო ეკონომიკის თვალსაზრისით, ყველგან გაუმჯობესდა ჩვენი რეიტინგი იმ საერთაშორისო სტრუქტურებში, რომლებიც აფასებენ ბიზნესის კეთებას. ყველგან გაუმჯობესდა, სადაც ვიყავით მე-12-ზე, ავედით მე-9-ზე და ასე შემდეგ," - ამის შესახებ კოალიცია "ქართული ოცნების" საპრეზიდენტო კანდიდატმა გიორგი მარგველაშვილმა ტელეკომპანია "კავკასიას" ეთერში ისაუბრა.
მარგველაშვილის განცხადებით, გარდა ამისა, გასული წლის წინასაარჩევნო პერიოდში კოალიცია "ქართული ოცნება" არც ამბობდა, რომ 2013 წელს ქვეყნის ეკონომიკაში სერიოზული გარღვევა იქნებოდა.
"ჩვენ ვამბობდით, რომ ეს ისეთი ეკონომიკაა ხალხნო, რომ ეს ეკონომიკა კი არ არის, ეს არის უცნაური ფინანსური სისტემა, რომელშიც რატომღაც იუსტიციის სამინისტრო გეგმავს ფულის მიღებას. 2013 წელს ჩვენი მიზანი იყო, რომ ეკონომიკა დაგვესტაბილურებინა, მაგრამ ამ დასტაბილურების პარამეტრებში ჩვენ ინვესტიციების და სამუშაო ადგილების ზრდა გვაქვს. ერთადერთი, რაც არის, ეს არის, რომ ჩვენი ეკონომიკის ზრდის ტემპი არის მხოლოდ დაახლოებით 2.5, ეს არის ზრდის ტემპი და არა - რაიმე კრიზისი. ანუ, ეკონომიკა იზრდება. რა თქმა უნდა, 2.5 არ არის იდეალური რიცხვი, ჩვენ რა თქმა უნდა მეტი გვინდა, მაგრამ ჩვენ მოვამზადეთ წინაპირობა ამ მეტისთვის, იმიტომ, რომ დავასტაბილურეთ ეკონომიკა, დავასტაბილურეთ ურთიერთობა სასამართლო სისტემასთან,"- განაცხადა გიორგი მარგველაშვილმა.