ჩრდილოატლანტიკური ალიანსის გენერალური მდივანი ანდერს ფოგ რასმუსენი საქართველოსა და უკრაინის ნატო-ში გაწევრიანებასთან დაკავშირებით რუსული მედიით გავრცელებულ ინფორმაციას უარყოფს.
რასმუსენის განცხადებით, საქართველოსა და უკრაინასთან ურთიერთობის თვალსაზრისით, ნატო-ს პოზიცია უცვლელია და ისინი ალიანსის წევრები გახდებიან.
"თუ მსგავსი ციტირება მოხდა, ის არაზუსტია. საქართველოსა და უკრაინასთან მიმართებაში ჩვენი პოზიცია არ შეცვლილა. 2008 წელს გადავწყვიტეთ, რომ საქართველო და უკრაინა ნატო-ს წევრები აუცილებლად გახდებიან და ეს გადაწყვეტილება კვლავ ძალაშია. საქართველო გახდება ნატო-ს წევრი, თუ ის საჭირო კრიტერიუმებს დააკმაყოფილებს. მოხარული ვარ, რომ საქართველოს ახალმა ხელისუფლებამაც დაადასტურა ქვეყნის მისწრაფება ნატოსკენ,"- განაცხადა ანდერს ფოგ რასმუსენმა.
რასმუსენის განცხადება, რომელშიც თითქოს იმ ამბობდა, რომ 2014 წელს საქართველო და უკრაინა ნატო-ში ვერ გაწევრიანდებიან, რუსულმა საინფორმაციო სააგენტოებმა 2 დღის წინ გაავრცელეს.
