ახალგაზრდა სოციოლოგების მიერ, მათსავე ინიციატივით, თბილისსა და საქართველოს რამდენიმე დიდ ქალაქში, კერძოდ: ბათუმში, ქუთაისში, ზუგდიდში, რუსთავში და თელავში. 22-23 ოქტომბერს ჩატარდა სოციოლოგიური გამოკითხვა, ერთადერთი კითხვით: "ვის მისცემთ ხმას 2013 წლის 27 ოქტომბრის არჩევნებში?"
გამოიკითხა 3427 რესპოდენტი. პირისპირ ინტერვიუს ფორმატში, მარტივი შემთხვევითი შერჩევის პრინციპით, აღნიშნული ქალაქების ხალხმრავალ ადგილებში. თბილისში გამოკითხვა ჩატარდა ყველა რაიონში: ისანში, სამგორში, ნაძალადევში, ვაკეში, გლდანში, საბურთალოზე.
გამოკითხვაში ფიგურირებდა ოთხი ძირითადი საპრეზიდენტო კანდიდატი: "ქართული ოცნების" საპრეზიდენტო კანდიდატი - გიორგი მარგველაშვილი, "ნაციონალური მოძრაობის" კანდიდატი - დავით ბაქრაძე, "ლეიბორისტული პარტიის" პრეზიდენტობის კანდიდატი - შალვა ნათელაშვილი და "დემოკრატიული მოძრაობის" საპრეზიდენტო კანდიდატი - ნინო ბურჯანაძე.
საერთო შედეგების მიხედვით, 3427 რესპოდენტიდან, 1242 ხმა მიიღო გიორგი მარგველაშვილმა, რაც არის ხმათა 36,2 პროცენტი. მეორე ადგილზეა შალვა ნათელაშვილი 1065 ხმით და 31,1 პროცენტით. მას მოსდევს დავით ბაქრაძე 357 ხმით, 10,4 პროცენტით. ნინო ბურჯანაძე კი მეოთხე ადგილზეა 9,3 პროცენტით, 310 ხმით.
სხვა კანდიდატებს ხმა 96 რესპოდენტმა დაუჭირა, რაც გამოკითხულთა 2,8 პროცენტია. კვლევის პერიოდში, თუ ვისთვის მიეცა ხმა, გადაწყვეტილი არ ქონდა 346 რესპოდენტს, ანუ 10,1 პროცენტს.