"ამ განცხადებამ ტემპერატურა აწია, ეს იყო ჩვენი მიზანი და ამ მიზანს მივაღწიეთ. ამ განცხადების კაკეთების შემდეგ ჩვენ მუდმივად ვიღებთ ინფორმაციას, რომ საარჩევნო გარემო შეიცვალა,"- ამის შესახებ კოალიცია "ქართული ოცნების" საპრეზიდენტო კანდიდატმა გიორგი მარგველაშვილმა TV-3-ის გადაცემა "დიდი პოლიტიკის" ეთერში ისაუბრა.
მარგველაშვილის თქმით, თუ ვინმემ არჩევნების მეორე ტურთან დაკავშირებით ბიძინა ივანიშვილის და მის მიერ გაკეთებული განცხადება და მოსახლეობისთვის არჩევნებზე მისვლისა და საკუთარი არჩევანის გაკეთებისკენ მოწოდება საზოგადოების შანტაჟად აღიქვა, მას ელემენტარულად სიტყვა "დემოკრატიის" მნიშვნელობა არ ესმის.
"საარჩევნო გარემოს სირბილემ გვაიძულა გვეთქვა ჩვენი ამომრჩევლისთვის, რომ ეს არ არის კონკრეტულად მხოლოდ "ქართული ოცნების" ან მხოლოდ გიორგი მარგველაშვილის არჩევნები, ეს არის საქართველოს პოლიტიკური ნების დაფიქსირების სერიოზული მომენტი, სადაც ყველა მოქალაქე, რომელიც დარდობს თავის თავზე, თავის ოჯახზე, ქვეყნის მომავალზე, უნდა იყოს გააქტიურებული და უნდა მივიდეს არჩევნებზე. ჩვენ ამას მივაღწიეთ,"- განაცხადა გიორგი მარგველაშვილმა.