საქართველოს პარლამენტის ეროვნულ ბიბლიოთეკაში ევროპულ და ევროატლანტიკურ სტრუქტურებში ინტეგრაციის საკითხებში საქართველოს სახელმწიფო მინისტრმა ალექსი პეტრიაშვილმა საქართველოს ევროკავშირში ინტეგრაციის საკითხებზე საზოგადოებრივ მრჩეველთა საბჭოსთან შეხვედრა გამართა.
შეხვედრაზე აღმოსავლეთ პარტნიორობის ვილნიუსის სამიტთან დაკავშირებული საკითხები, 2014-2017 წლებისთვის „ევროინტეგრაციის საკითხთა კომუნიკაციისა და ინფორმაციის შესახებ საქართველოს მთავრობის სტრატეგიის" განხორცილებისა და არასამთავრობო ორგანიზაციებთან თანამშრომლობის შესაძლებლობები განიხილეს და ინფორმაცია მოისმინეს „ნატოსა და ევროკავშირის შესახებ საინფორმაციო ცენტრის მიერ განხორცილებული საქმიანობისა და სამომავლო გეგმების შესახებ.
„ვილნიუსის სამიტი ახლოვდება ძალიან მნიშვნელოვანი დინამიური მოვლენების ფონზე. საქართველოს მთავრობა ძალიან აქტიურად მუშაობს, რათა ეს სამიტი ყოველმხრივ იყოს წარმატებული. პირველი, რაც მინდა აღვნიშნო, რომ ასოცირების შეთანხმებისა და მასთან ერთად თავისუფალი ვაჭრობის შეთანხმებების პარაფირების საკითხი კარგა ხანია გადაწყვეტილია. მოლაპარაკებების დასრულების შემდგომ დაჩქარდა უმნიშვნელოვანესი პროცესი-დავიწყეთ ამ დოკუმენტის თარგმნა ქართულ ენაზე. ევროკავშირი თვითონ განსაკუთრებული ყურადღებით ეპყრობა ამ საკითხს, ვინაიდან შემიძლია თამამად განვაცხადო, რომ გადაწყეტილია ევროკომისიის ვადის ამოწურვამდე აღნიშნული შეთანხმებების ხელმოწერა. გვქონდა შეხვედრები ბრიუსელში,ასევე, ვაშინგტონში, მიუხედავად კრიზისისა ძალიან სერიოზული ინტერესი და ყურადღება არის მიპყრობილი ვილნიუსის სამიტზეც და ამ შეთანხმების პარაფირებასა და ხელმოწერაზეც. ეს მნიშვნელოვნად განაპირობა საქართველოსა და სხვა აღმოსავლეთ პარტნიორობის ქვეყნების მიმართ გაძლიერებულმას ზეწოლამ რუსეთის მხრიდან", _განაცხადა პეტრიაშვილმა.
საზოგადოებრივ მრჩეველთა საბჭოსთან შეხვედრა კითხვა-პასუხის რეჟიმში წარიმართა. ექსპერტებმა და არასამთავრობო ორგანიზაციების წარმომადგენლებმა ყურადღება გაამახვილეს ვილნიუსის სამიტის შემდგომ საქართველოს მთავრობის სტრატეგიაზე ევროკავშირთან ინტეგრაციის თვალსაზრისით.
საქართველოს ევროკავშირში ინტეგრაციის საკითხებზე სახელმწიფო მინისტრის მრჩეველთა საბჭოსთან შეხვედრები პერიოდულად იმართება.
შეხვედრებზე ევროკავშირ-საქართველოს ურთიერთობებისა და საზოგადოებისთვის მნიშვნელოვანი სხვა აქტუალური საკითხები განიხილება.
