საპრეზიდენტო არჩევნებისთვის ამომრჩეველთა საერთო რაოდენობა 3, 537, 719 მოქალაქეს შეადგენს.შესაბამისი განცხადება ცესკო-ს სპიკერმა ეკატერინე აზარაშვილმა გააკეთა.
2012 წლის საქართველოს პარლამენტის არჩევნებისთვის ამომრჩეველთა საერთო რაოდენობა შეადგენდა 3, 613, 851-ს.
ცესკო-ს განმარტებით, ამ განსხვავების ერთ-ერთი ძირითადი მიზეზი მოქალაქეების რეგისტრაციიდან მოხსნა გახდა.
"საარჩევნო ადმინისტრაციამ შესაბამის უბნებში გამოაკრა 74 896 რეგისტრაციიდან მოხსნილი მოქალაქის სია და მათ შესაძლებლობა მისცა გადაემოწმებინათ საკუთარი სტატუსი", - განუცხადა ეკატერინე აზარაშვილმა ჟურნალისტებს.
ცესკო-ს ცნობით, 2013 წლის 27 ოქტომბრის საქართველოს პრეზიდენტის არჩევნებისთვის, საზღვარგარეთ გახსნილ 52 საარჩევნო უბანში, კენჭისყრაში მონაწილეობის შესაძლებლობა 48 458 ამომრჩეველს ექნება.
2012 წელს, პარლამენტის არჩევნებზე საზღვარგარეთ მყოფ ამომრჩეველთა რაოდენობა შეადგენდა 45, 100-ს.
"სახელმწიფო სერვისების განვითარების სააგენტოს მონაცემების მიხედვით, რეგისტრაციიდან მოხსნილი ამომრჩევლებიდან 10 ოქტომბრის ჩათვლით ხელახალი რეგისტრაცია გაიარა 9, 142 მოქალაქემ. შესაბამისად, ისინი მიიღებენ მონაწილეობას საპრეზიდენტო არჩევნებში. ვინც კანონით დადგენილ ვადაში ვერ შეძლო რეგისტრაციის გავლა, ისინი ვერ მოხვდნენ ამომრჩეველთა სიაში. ამომრჩეველთა სიაში ასევე ვერ მოხვდა საზღვარგარეთ მყოფი 3, 979 საქართველოს მოქალაქე, რომელთა რეგისტრაციაც გაუქმებულია სახელმწიფო სერვისების განვითარების სააგენტოს მიერ. ცესკო, იუსტიციისა და საგარეო საქმეთა სამინისტროებთან ერთად ახორციელებს საზღვარგარეთ მყოფი რეგისტრაციიდან მოხსნილი მოქალაქეების ინფორმირებას", - განაცხადა აზარაშვილმა.
ამასთან, ცესკო-ს ცნობით, ბიულეტენების ბეჭდვის პროცესი 21 ოქტომბრიდან დაიწყება. ბიულეტენები თბილისის 10 სტამბაში დაიბეჭდება. ბიულეტენების ბეჭდვის პროცესს ცესკო-ს წევრებთან ერთად, 7 არასამთავრობო ორგანიზაციის დამკვირვებლები დააკვირდებიან.
