გაერო-ში საქართველოს მუდმივმა წარმომადგენელმა კახა იმნაძემ გენერალური ასამბლეის პირველი კომიტეტის მე-6 შეხვედრაზე საქართველოში საოკუპაციო ხაზის გასწვრივ არსებულ მძიმე ვითარებაზე და რუსეთის საოკუპაციო ჯარის უკანონო ქმედებებზე ისაუბრა.
"საქართველოს ტერიტორიის 20% უკანონო სამხედრო ოკუპაციის ქვეშ რჩება, რაც სერიოზულ საფრთხეს უქმნის ჩემი ქვეყნის უსაფრთხოებას და მისი მოქალაქეების კეთილდღეობას. რუსული სამხედრო არსენალი განუწყვეტლივ იზრდება 2008 წლის ოკუპაციის შემდეგ, რაც წარმოადგენს საერთაშორისო სამართლის და ცეცხლის შეწყვეტის შესახებ ექვსპუნქტიანი შეთანხმების უხეშ დარღვევას", - განაცხადა კახა იმნაძემ.
საქართველოს ელჩის განცხადებით, იმ ფონზე, რომ ოკუპირებულ ტერიტორიებზე არ მოქმედებს საერთაშორისო მექანიზმები, არ არსებობს გარანტიები, რომ სამხედრო არსენალი, მათ შორის, ყველაზე საშიში იარაღის სისტემები არ მოხვდება ტერორისტებისა და კრიმინალური დაჯგუფებების ხელში.
კახა იმნაძემ საოკუპაციო ხაზზე, ბოლო დროს განვითარებულ პროცესებზე ისაუბრა. ელჩის ინფორმაციით რუსეთის საოკუპაციო ძალებმა მავთულხლართებისა და ბარიერების აღმართვა ჯერ კიდევ 2009 წელს დაიწყეს და ამ პროცესებმა ინტენსიური ხასიათი ბოლო პერიოდში მიიღო.
"საოკუპაციო ძალებმა დაიწყეს მავთლულხლართებისა და ბარიერების მასშტაბური აღმართვა საოკუპაციო ხაზის გასვწრივ. ბოლო თვეებში ეს პროცესი უფრო ინტენსიური და მასშტაბური გახდა. დღეისათვის მავთულხლართების და სხვა ფიზიკური დაბრკოლებების საერთო სიგრძემ 35 კილომეტრს მიაღწია. მსგავსი პროცესი ხდება აფხაზეთშიც, საქართველო, სადაც ოკუპანტებს გაჰყავთ თხრილები და აგებენ სხვადასხვა სახის ზღუდეებს", - აღნიშნა კახა იმნაძემ.
მისი თქმით, აღნიშნულ პროცესს თან ახლავს ადგილობრივი მოსახლეობის დაშინების და მათ მიმართ ძალადობის ფაქტები, ადამიანებს წართმეული აქვთ თავიანთი ფუნდამენტური უფლებები და დროა, რომ საერთაშორისო თანამეგობრობამ დაიცვას ის პრინციპები, რაც ასახულია გაერო-ს ქარტიაში.
ცნობისათვის, გაერო-ს გენერალური ასამბლეის პირველი კომიტეტი წარმოადგენს განიარაღების და საერთაშორისო უსაფრთხოების კომიტეტს, რომელზეც დებატების დროს განიხილება განიარაღების, გლობალური გამოწვევებისა და საერთაშორისო უსაფრთხოების საკითხები.
საოკუპაციო ხაზზე რუსეთის საოკუპაციო ძალები უკანონო ქმედებაზე გაერიში საქართველოს წარმომადგენლობამ გენერალური ასაბლეის მესამე კომიტეტის სხდომაზეც დააყენა, სადაც ჰუმანირატულ, კსოციალურ და კულტურულ საკითხებს განიხილავენ. ქართულმა მხარემ აღნიშნულ კომიტეტზე ოკუპირებულ ტერიტორიებზე ადამიანის უფლებათა დარღევევის და ჰუმანიტარულ საკითხებზე გაამახვილა ყურადღება.
