საქართველოს პარლამენტის თავმჯდომარე დავით უსუფაშვილი საზოგადოებას სთხოვს პრემიერ-მინისტრ ბიძინა ივანიშვილის და კოალიცია "ქართული ოცნების" საპრეზიდენტო კანდიდატის გიორგი მარგველაშვილის განცხადებები პირდაპირი მნიშვნელობით არ გაიგონ.
უსუფაშვილის განმარტებით, საპრეზიდენტო არჩევნების მეორე ტურთან დაკავშირებით ივანიშვილის და მარგველაშვილის განცხადებები მეტაფორული იყო.
"ეს მიანიშნებს იმ დამოკიდებულებაზეც, რომ მას დაბადებიდან კი არ უოცნებია პრეზიდენტობაზე, არამედ მზად არის, ეს ფუნქცია შეასრულოს მხოლოდ იმ შემთხვევაში, თუ ხალხის ნდობას მოიპოვებს. ვფქრობ, ეს სწორია. რაც შეეხება ბიძინა ივანიშვილის განცხადებას, ესეც იყო მეტაფორა და არა ის, რომ აუცილებლად ასე მოხდება. თუ დავუკვირდებით, ყველა კანდიდატი თავის დამოკიდებულებას აცხადებს არჩევნების თაობაზე. მაგალითად, გუშინ ორი კანდიდატისგან მოვისმინე, რომ 50% გარანტირებული აქვს, მათ შორის არა მათგან, ვიზეც ზოგადად საუბრობენ, რომ საპრიზო ადგილებზე გადიან. ბრძოლაა, კონკურენციაა და კანდიდატები თავიანთ დამოკიდებულებას და მოლოდინს გამოხატავენ სხვადასხვა ფორმით და არავითარ შემთხვევაში ეს არ ნიშნავს იმას, რომ ყველა ეს სიტყვა პირდაპირი მნიშვნელობით უნდა გავიგოთ",- განაცხადა დავით უსუფაშვილმა.
შეგახსენებთ, რომ საქართველოს პრემიერ-მინისტრმა ბიძინა ივანიშვილმა მისი პოლიტიკური კოალიციის საპრეზიდენტო კანდიდატს გიორგი მარგველაშვილს არჩევნების მეორე ტურში მონაწილეობისგან თავის შეკავება ურჩია. ივანიშვილის აღნიშნულ განცხადებას გიორგი მარგველაშვილი გამოეხმაურა და განაცხადა, რომ საპრეზიდენტო არჩევნების მეორე ტურის დანიშვნის შემთხვევაში, კენჭისყრაში მონაწილეობის აზრს ვერ ხედავს.
