საქართველოს ელჩი მექსიკაში, მალხაზ მიქელაძე სამუშაო ვიზიტით პანამას ესტუმრა და იბეროამერიკულ სამიტში მიიღო მონაწილეობა. ვიზიტისას, ელჩმა, ორმხრივი შეხვედრები გამართა პანამის აღმასრულებელი, საკანონმდებლო და საზოგადოების სხვადასხვა წრეების წარმომადგენლებთან.
16 ოქტომბერს მალხაზ მიქელაძე შეხვდა პანამის რესპუბლიკის საგარეო საქმეთა მინისტრს, ბატონ ფერნანდო ნუნიეს ფაბრეგასს, რომელთანაც განხილულ იქნა ორმხრივი თანამშრომლობის ფართო სპექტრი. მხარეები შეთანხმდნენ პოლიტიკური დიალოგის ხელშეწყობაზე, მიმოიხილეს ორმხრივი ურთიერთობების გაღრმავების გზები, აღნიშნეს პანამასა და საქართველოს შორის არსებული მეგობრული და პარტნიორული ურთიერთობები. ასევე საქართველოს ელჩი შეხვდა პანამის ეროვნულ ასამბლეაში, საგარეო საკითხთა კომიტეტის პრეზიდენტს ქალბატონ დალია ბერნალს, რომელთანაც განიხილა ორი ქვეყნის საკანონმდებლო ორგანოებს შორის თანამშრომლობის ხელშეწყობის შესაძლებლობები.
საქართველოს მხრიდან აღინიშნა საქართველოს პარლამენტში პანამის რესპუბლიკასთან მეგობრობის ჯგუფის ჩამოყალიბება, ხოლო პანამის მხარემ გამოთქვა ანალოგიური ჯგუფის შექმნის მზაობა მიმდინარე წლის ბოლომდე. მხარეებმა მიმოიხილეს ორმხრივი თანამშრომლობის დღის წესრიგი და ხაზი გაუსვეს საკანონმდებლო ორგანოებს შორის გამოცდილების გაზიარების მნიშვნელობას.
ქალბატონმა დალია ბერნალმა და მალხაზ მიქელაძემ ეროვნული ასამბლეის ტელეარხთნ მიცემულ ინტერვიუებში გამოხატეს ორ ქვეყანას შორის ჩამოყალიბებული მეგობრული ურთიერთობების განვითარების ინტერესი. ვიზიტის ფარგლებში საქართველოს ელჩი მონაწილეობას მიიღებს იბეროამერიკული სამიტის მუშაობაში, რომლის ფარგლებშიც შეხვდება ლათინური ამერიკის ქვეყნების წარმომადგენლებს და განიხილავს არსებული პარტნიორობის განვითარების შესაძლებლობებს.