1 ნოემბერს ლონდონში „ღია მმართველობის პროგრამის" გლობალური სამიტი გაიმართება, რომელსაც პროგრამაში ჩართული 60-მდე ქვეყნის დელეგატები დაესწრებიან. ღონისძიების მონაწილეები ერთმანეთს იმ შედეგებს გააცნობენ, რომელთაც პროგრამაში ჩართულმა ქვეყნებმა უკანასკნელი წლის განმავლობაში მიაღწიეს ხელისუფლებების გამჭვირვალობის, ანგარიშვალდებულებისა და ეფექტიანობის გაზრდის კუთხით. შეხვედრის დასკვნითი ნაწილი დაჯილდოების ცერემონიალს დაეთმობა - გლობალური სამიტის მონაწილეები გამარჯვებულ პროექტს გამოავლენენ, რომელმაც ყველაზე განსაკუთრებული წვლილი შეიტანა სახელმწიფო მმართველობაში სამოქალაქო ჩართულობის გაზრდის თვალსაზრისით. წელს პირველად შვიდ წარმატებულ პროექტს შორის, რომელთაგანაც გამარჯვებული შეირჩევა, ქართული პროექტი „საჯარო ინფორმაციის პროაქტიულად გამოქვეყნება და ელექტრონულად გამოთხოვა" მოხვდა.
დიდი ბრიტანეთის მინისტრთა კაბინეტმა „ღია მმართველობის პარტნიორობის" ინიციატივის ფარგლებში დაწესებულ საპრიზო ნომინაციაზე - „Bright Spots Prize", 2013 წლის 16 ოქტომბერს შვიდი ქვეყანა წარადგინა: ჩილე, ესტონეთი, ინდონეზია, მონტენეგრო, ფილიპინები, რუმინეთი და საქართველო. საქართველოს მიერ განხორციელებული პროექტი, რომელიც ნომინაციაზე წარდგენის საფუძველი გახდა, ინფორმაციის თავისუფლების სფეროში შესრულებულ რეფორმას ეხება. პროექტი არასამთავრობო ორგანიზაციების მთავრობასთან თანამშრომლობის წარმატებულ მაგალითად დასახელდა. ამ ნომინაციაში საუკეთესოს არასამთავრობო ორგანიზაციები წარადგენენ. ქართულ პროექტს რეკომენდაცია ინფორმაციის თავისუფლების განვითარების ინსტიტუტმა გაუწია.
კონკურსის მიზანია, გამოავლინოს ყველაზე ინოვაციური და წარმატებული ინიციატივები, რომლებიც მიზნად ისახავდა მთავრობის ღიაობისა და ანგარიშვალდებულების გაზრდას, თანამედროვე ტექნოლოგიების გამოყენების გზით სახელმწიფო მმართველობაში მოქალაქეთა ჩართულობის უზრუნველყოფას.
დიდი ბრიტანეთის მინისტრის (Francis Maude) თქმით, „ნომინაციაზე წარდგენილი პროექტები ნათელს ხდის, თუ როგორ არის შესაძლებელი მოქალაქეებისა და სამოქალაქო საზოგადოების ერთობლივი ჩართულობით ნაკისრი ამბიციური ვალდებულებების პრაქტიკაში ეფექტიანად განხორციელება".
