"ცოტა ხანი დამშვიდდი, მაცადე. დამშვიდდი ცოტა ხანი, მოისვენე, თორემ მოგასვენებ, ისედაც რომ გპასუხობ, ეგეც დიდი რამეა,"-ასე მიმართა კოალიცია "ქართული ოცნების" საპრეზიდენტო კანდიდატმა გიორგი მარგველაშვილმა "ქრისტიან დემოკრატიული მოძრაობის" პრეზიდენტობის კანდიდატს გიორგი თარგამაძეს "პირველი არხის" ეთერში გამართულ წინასაარჩევნო დებატებში დასმული საკითხის კომეტირებისას.
მარგველაშვილმა მისი კონკურენტი კანდიდატის მხრიდან საქართველოს ხელისუფლების მიერ განხორციელებული და დაგემილი სოციალური პროექტების შესახებ დასმულ კითხვებს უპასუხა.
"ის ანეგდოტი რომ არის, ერთი, ორი, სამი.. სამ კითხვას უნდა ვუპასუხო ერთდროულად?! პენსიების საკითხი 250 ლარზე და 150 ლარზე ეს არის სუფთა პოპულიზმი, იმიტომ, რომ ჩვენთვის მთავარია ავამაღლოთ ის პენსიები, რომელიც არსებობს და არა - ელემენტარულად ვეთამაშოთ სხვადასხვა რიცხვებს პოპულისტურად. ჩვენ შევძელით და პენსიები ავიყვანეთ 150 ლარამდე და პენსიების ზრდას მომავალშიც ვაპირებთ და არა - უბრალოდ ვეთამაშებით რიცხვებს. მეორე თემა იყო მიწებთან დაკავშირებით. ჩვენ გამოვაცხადეთ მორატორიუმი მიწებზე. სანამ ეს საკითხი დეტალურად არ იქნება შესწავლილი და სანამ პარლამენტი არ მიიღებს ისეთ გადაწყვეტილებას, რომელიც იქნება ერთდროულად ბიზნესის განვითარებისთვის წამახალისებელი და ამავე დროს, ჩვენს ეროვნულ ინტერესებს არ შელახავს. ბოლო თემაა, ლაპარაკია ოჯახის განსაზღვრებასთან დაკავშირებით რამდენადაც მე ვხვდები. ეს თემა ხომ საერთოდ ჰაერიდან არის მოტანილი?! ვისაც არ ესმის ოჯახი რას წარმოადგენს, იმან არკვიოს ეს თემა. ჩემთვის აბსოლუტურად გასაგებია ოჯახი რა არის, რომ ეს არის ქალისა და კაცის ერთობლივად შექმნილი ინსტიტუტი, სადაც ბავშვები იზრდებიან. დანარჩენი, ვისაც არ ესმის ეს თემა, მან განავითაროს და მან იძიოს ეს თემა მომავალში,"- განაცხადა გიორგი მარგველაშვილმა.
