საქართველოს პრეზიდენტის მიხეილ სააკაშვილის განცხადებით, ქუთაისში მდებარე პარლამენტის შენობის ირგვლივ ტერიტორია ნაცვლად იმისა, რომ დასასვნებელ პარკად გადაქცეულიყო, ძროხების საძოვრადაა გადაქცეული.
"თქვენ ნახეთ, რომ ამხელა შენობა პარლამენტის ჩვენ ავაშენეთ პრაქტიკულად ერთ წელიწადში. კიდევ ერთი თვე უნდოდა, რომ გარშემო ტერიტორია მოწესრიგებულიყო. ახლა იმის ნაცვლად, რომ ეს ტერიტორია მოეწესრიგებინათ და ქუთაისელებისთვის, ხელოვნური ტბა, პარკი და უამრავი დაგეგმილი რამ გაეკეთებინათ, გადაქცეულია საძოვრად. გუშინ აქ რომ გადავიფრინე, თივის ზვინებით იყო გარემოცული. დღეს რომ გაიგეს მოვდივარ, მთელი ღამე აწყობდნენ და წაიღეს. მაგრამ რა მნიშვნელობა აქვს, გაიხედეთ, ძროხებით არის სავსე აქაურობა. მსოფლიოს ყველაზე ლამაზი პარლამენტი თანდათან გადაიქცა საძოვრად,"- განაცხადა მიხეილ სააკაშვილმა.
ქვეყნის პირველი პირის განმარტებით, საქართველოს მთავრობა საპრეზიდენტო არჩევნების პირველივე ტურში მოგებისთანავე საკონსტიტუციო ქვორუმის დაწევას და პარლამენტის ადგილსამყოფელის შეცვლას გეგმავს.
"რაც მინდა ვუთხრა ქუთაისელებს, ერთ-ერთი მთავარი გეგმა, რაც დღეს მთავრობას აქვს, არის ის, რომ პირველ ტურში დაამთავრონ არჩევნები და პირველივე კენჭისყრაზე დააყენონ კონსტიტუციური ქვორუმის ჩამოწევა ქუთაისიდან პარლამენტის აღებაზე. მერე მინდა ვუთხრა ჩემს საყვარელ ქუთაისელებს, წყალტუბოელებს, ხონელებს, ბაღდათელებს და ყველას დასავლეთ საქართველოს მაცხოვრებლებს: ძალიან მიყვარხართ, მაგრამ არავინ არ მითხრას მე, რომ მიშა რა დღეში ჩაგვყარეო. თქვენ აძლევთ ახლა ხმას, თქვენი გადასაწყვეტია უნდა იყოს თუ არა ქუთაისი საპარლამენტო დედაქალაქი. ეს აღარ არის უკვე ჩემი გადასაწყვეტი. მე გადავწყვიტე და გავაკეთე. მერე თქვენ სხვანაირად გადაწყვიტეთ შარშან, ოქტომბერში. ჩვენ მთელი წელი გვიჭირავს, რომ მათ არ აიღონ საკონსტიტუციო უმრავლესობა. მე მიჭირავს კბილებით პირადად, რომ პარლამენტი არ წაიღონ აქედან. ისინი ელოდებიან არჩევნების პირველ ტურში დამთავრებას, რომ პარლამენტი წაიღონ. ეს როგორ მოხდება, ჩემზე უკვე საერთოდ აღარ არის დამოკიდებული. დემოკრატიაა, მე დიქტატურა არ დავამყარე, პინოჩეტი არ გავმხდრავარ და ვერც გავხდებოდი, ძალიან მიყვარხართ და ძალიან გენდობით. ყველაფერი არის თქვენს ხელში - თუ გინდათ, რომ განვითარება გაგრძელდეს, რომელიც უკვე შეფერხდა და თუ არ გინდათ, რომ ეს პარლამენტი და სხვა პროექტები გავცვალოთ რაღაც მითიურ დაპირებებზე, დაპირებულ ფულებზე, რომლებსაც არც მოგვცემს არავინ და არც აპირებდა ვინმე მოცემას და არც მომავალში ამას ვერ ვნახავთ,"- აღნიშნა სააკაშვილმა.