ევროპელი დემოკრატების ლიდერის პაატა დავითაიას განცხადებით, რეინტეგრაციის საკითხებში სახელმწიფო მინისტრმა პაატა ზაქარეიშვილმა და სპორტის და ახალგაზრდულ საქმეთა მინისტრმა ლევან ყიფიანმა მინიმუმ თანამდებობები უნდა დატოვონ, ან ქართული საზოგადოების წინაშე ბოდიში მოიხადონ.
დავითაიას თქმით, "მიუღებელია, როდესაც ზაქარეიშვილი ტუალეტის ოკუპაციას ადარებს ტერიტორიულ ოკუპაციას და როდესაც სპორტის მინისტრს ავიწყდება, რომ ოლიმპიური თამაშები საქართველოს ყოფილ ტერიტორიაზე ტარდება".
"დღეს ჩვენი დამოუკიდებლობა დგას კითხვის ნიშნის ქვეშ. ყოველ დღე ხდება ტერიტორიების გადმოწევა და ტერიტორიები უფრო დიდი საფრთხის ქვეშაა. ჩვენ ყველაფერი უნდა გავაკეთოთ, რათა პოზიციები დავიცვათ, მაგრამ ყველაზე საკვირველი არის ის, რომ ღიად საუბარი არის ევრაზიულ კავშირზე. ჩემთვის მიუღებელია როდესაც ზაქარეიშვილი ტუალეტის ოკუპაციას ადარებს ტერიტორიულ ოკუპაციას. ეს ყოვლად მიუღებელია. მიუღებელია როდესაც სპორტის მინისტრი, რომელიც არამარტო სპორტის მინისტრია, არამედ პოლიტიკური თანამდებობის პირია, მას დაავიწყდა, რომ ოკუპირებულია ტერიტორიები. მას დაავიწყდა, რომ ოლიმპიური თამაშები ტარდება საქართველოს ყოფილ ტერიტორიაზე. მისთვის ეს არის პოლიტიკა, მაგრამ განსხვავება ჩემსა და მას შორის არის ის, რომ ჩემი ცხოვრების ნაწილია აფხაზეთი, ჩემი ტერიტორიაა ოკუპირებული ჩემი ოჯახის წევრები არიან დახვრეტილნი და დღეს ეს არაფერი. ამიტომ, ვაყენებ საკითხს ამ ორმა მინისტრმა მინიმუმ დატოვონ თანამდებობა ან საჯაროდ მოიხადონ ბოდიში ქართული საზოგადოების წინაშე", - განაცხადა პაატა დავითაიამ.
ცნობისთვის, რეინტეგრაციის საკითხებში სახელმწიფო მიინისტრის პაატა ზაქარეიშვილის განცხადებით, სოჭის ოლიმპიადაში მონაწილეობის საწინააღმდეგოდ შექმნილ პეტიციაზე მოქალაქეთა ხელმოწერები ქართველი სპოტსმენების მიერ ოლიმპიურ თამაშებში მონაწილეობის გადაწყვეტილებაზე გავლენას ვერ მოახდენს. მისი თქმით, "პეტიციის ხელმომწერები "ავარდნენ" ერთ მეჩირაღდნეზე, რაც არ არის გადაწვეტილების შესაცვლელად საკმარისი საფუძველი".
ამასთან, ზაქარეიშვილი მიიჩნევს, რომ "ერთი მეჩირაღდნე არ არის ის არგუმენტი, რის გამოც ოლიმპიადას ბოიკოტი უნდა გამოვუცხადოთ".
"14 000 კაციდან ყველა რომ ყოფილიყო რუსეთ-საქართველოს ომის მონაწილე და ყველას რომ ჩირაღდანი აეღო, ეს იქნებოდა გამოწვევა და მხოლოდ მაშინ შეიძლებოდა ეს სერიოზული საკითხი ყოფილიყო. 14 000 კაციდან ერთადერთი ადამიანია და შენ ამაზე რომ წაიბორძიკებ, ეს იმას ნიშნავს, რომ სახელმწიფო არ ხარ. მაშინ, როცა შენ, სახელმწიფომ განაცხადე, რომ მიუხედავად იმისა, რომ იყო კონფლიქტი და ოკუპაცია და აღიარება, ჩვენ, ახალი მთავრობა ვეძებთ რუსეთთან ურთიერთობებს, ამ ყველაფრის დალაგებას ვცდილობთ, ამიტომ ჩვენთვის მორალურად მძიმე გადასაწყვეტია, მაგრამ მაინც ვაპირებთ წავიდეთ ოლიმპიადაზე. ჩვენ ვთქვით, რომ მიუხედავად ოკუპაციის აღიარებისა, მაინც რუსეთთან კარგი ურთიერთობებიდან გამომდინარე, ჩვენ ვაპირებთ წავიდეთ ოლიმპიადაზე. რუსეთს არ აწყობს, რომ გაშიშვლდეს. მთავარი პრობლემა საქართველო კი არ იყო, სააკაშვილი იყო. სააკაშვილის არასწორმა ავანტიურისტულმა პოლიტიკამ გამოიწვია დაძაბულობები,"- განაცხადა პაატა ზაქარეიშვილმა.