ეროვნულ-დემოკრატიული პარტიის ლიდერი ბაჩუკი ქარდავა მიიჩნევს, რომ სოჭის ოლიმპიურ თამაშებში საქართველოს მონაწილეობის საკითხზე რეინტეგრაციის საკითხებში სახელმწიფო მინისტრის პაატა ზაქარეიშვილის მიერ გაკეთებული განცხადებები აშკარად პრორუსული და ქართული ღირსების შემლახავია.
როგორც ქარდავამ "ჯი-ეიჩ-ენთან" საუბრისას აღნიშნა, "ზაქარეიშვილი პოლიტიკურად პასუხისმგებელი პირია და მსგავსი მინისტრი ნამდვილად შეურაცხყოფა იქნება საქართველოს მთავრობისთვის".
"უბრალოდ არ შეიძლება იმ განცხადებების შემდეგ ამ ადამიანებს პოლიტიკური პასუხისმგებლობა ჰქონდეთ. იმიტომ, რომ გასაგებია, სპორტის მინისტრის მიმართულება სპორტია, მაგრამ მინისტრის პოსტი არის პოლიტიკური თანამდებობა, ის არის მთავრობის წარმომადგენელი. ასევე, ზაქარეიშვილი არ არის აღარ არის არასამთავრობო ორგანიზაციის წარმომადგენელი, როგორც ადრე იყო და თურმე მას დღეს ამ საზოგადოებრივი ორგანიზაციების ზეწოლა აღიზიანებს. მე მინდა მას შევახსენო, რომ ის არის პოლიტიკურად პასუხისმგებელი პირი, რომელმაც გააკეთა აშკარად პრორუსული და ქართული ღისრების შემლახავი განცხადება. ამიტომ, ასეთი მინისტრი ნამდვილად შეურაცხყოფა იქნება საქართველოს მთავრობისთვის,"- განაცხადა ბაჩუკი ქარდავამ.
ცნობისთვის, რეინტეგრაციის საკითხებში სახელმწიფო მიინისტრის პაატა ზაქარეიშვილის განცხადებით, სოჭის ოლიმპიადაში მონაწილეობის საწინააღმდეგოდ შექმნილ პეტიციაზე მოქალაქეთა ხელმოწერები ქართველი სპოტსმენების მიერ ოლიმპიურ თამაშებში მონაწილეობის გადაწყვეტილებაზე გავლენას ვერ მოახდენს. მისი თქმით, "პეტიციის ხელმომწერები "ავარდნენ" ერთ მეჩირაღდნეზე, რაც არ არის გადაწვეტილების შესაცვლელად საკმარისი საფუძველი".
ამასთან, ზაქარეიშვილი მიიჩნევს, რომ "ერთი მეჩირაღდნე არ არის ის არგუმენტი, რის გამოც ოლიმპიადას ბოიკოტი უნდა გამოვუცხადოთ".
"14 000 კაციდან ყველა რომ ყოფილიყო რუსეთ-საქართველოს ომის მონაწილე და ყველას რომ ჩირაღდანი აეღო, ეს იქნებოდა გამოწვევა და მხოლოდ მაშინ შეიძლებოდა ეს სერიოზული საკითხი ყოფილიყო. 14 000 კაციდან ერთადერთი ადამიანია და შენ ამაზე რომ წაიბორძიკებ, ეს იმას ნიშნავს, რომ სახელმწიფო არ ხარ. მაშინ, როცა შენ, სახელმწიფომ განაცხადე, რომ მიუხედავად იმისა, რომ იყო კონფლიქტი და ოკუპაცია და აღიარება, ჩვენ, ახალი მთავრობა ვეძებთ რუსეთთან ურთიერთობებს, ამ ყველაფრის დალაგებას ვცდილობთ, ამიტომ ჩვენთვის მორალურად მძიმე გადასაწყვეტია, მაგრამ მაინც ვაპირებთ წავიდეთ ოლიმპიადაზე. ჩვენ ვთქვით, რომ მიუხედავად ოკუპაციის აღიარებისა, მაინც რუსეთთან კარგი ურთიერთობებიდან გამომდინარე, ჩვენ ვაპირებთ წავიდეთ ოლიმპიადაზე. რუსეთს არ აწყობს, რომ გაშიშვლდეს. მთავარი პრობლემა საქართველო კი არ იყო, სააკაშვილი იყო. სააკაშვილის არასწორმა ავანტიურისტულმა პოლიტიკამ გამოიწვია დაძაბულობები,"- განაცხადა პაატა ზაქარეიშვილმა.