საპარლამენტო უმრავლესობის წევრის, სპორტისა და ახალგაზრდულ საქმეთა კომიტეტის თავმჯდომარის პირველი მოადგილის შოთა ხაბარელის განცხადებით, სოჭის ოლიმპიურ თამაშებში მონაწილეობის საკითხი ქართული მხარის მიერ უკვე გადაწყვეტილია და მისი გადახედვა გაუმართლებელი იქნება.
როგორც ხაბარელმა "ჯი-ეიჩ-ენთან" საუბრისას განმარტა, აღნიშნული ოლიმპიადის ბოიკოტირების შემთხვევაში, საქართველოს სერიოზული სანქციები დაუწესდება და მომდევნო 8 წლის განმავლობაში ოლიპმიურ შეჯიბრში მონაწილეობა აეკრძალება.
ამასთან, როგორც ხაბარელი განმარტავს, "ეს არ არის რუსეთის ოლიპიადა და მისი ბოიკოტირების შემთხვევაში ბოკიკოტს საერთაშორისო ოლიპიურ კომიტეტს გამოვუცხადებთ".
ხაბარელი პრეზიდენტ მიხეილ სააკაშვილის იმ განცხადებასაც გამოეხმაურა, რომლის თანახმად ქვეყნის პირველი პირი ოლიმპიურ კომიტეტს სოჭის ოლიმპიურ თამაშებში მონაწილეობის საკითხთან დაკავშირებით ადეკვატური გადაწყვეტილების მიღებისკენ მოუწოდებს.
"ეს გადაწყვეტილება მიღებულია ოლიმპიური კომიტეტის მიერ და არ იქნება ცვლილება შეტანილი. პრეზიდენტს მინდა გავახსენო 2008 წლის ომის დროს მსგავსი გადაწყვეტილების მიღება უნდოდა, ოლიმპიური სოფლიდან უნდა წამოსულიყვნენ ქართველები და იმას არ ფიქრობდა თუ რა შეიძლებოდა მოჰყოლოდა ამას ამის შემდეგ. თავისთავად ცხადია, შემდეგი 8 წელიწადი ჩვენ ვერ მივიღებდით მონაწილეობას ოლიმპიურ თამაშებში და ზუსტად იმ ოლიპიურ თამაშებში, რომელზეც შეაბრუნა ქართველი მონაწილეები და მათი იქ დარჩენის გადაწყვეტილება მიიღო, ჩვენ 3 ოქროს და 3 ბრინჯაოს მედალი მოვიპოვეთ და 205 ქვეყნიდან 7-ე ადგილზე ჩამოვედით. ეს არის ზუტად ჩვენი დაპირისპირება, ჩვენ აუცილებლად უნდა გამოვიდეთ ამ ოლიმპიადაზე და თუ არ გამოვალთ, დაზარალდება ქართული სპორტი. ვიმეორებ, ეს არ არის რუსეთის ოლიმპიური თამაშები, ჩვენ ვუცხადებთ ბოიკოტს საერთაშორისო ოლიმპიურ კომიტეტს, რომელიც არანაირად გამართლებული არ არის,"- განაცხადა შოთა ხაბარელმა.
ცნობისთვის, მიხეილ სააკაშვილი საქართველოს ოლიმპიური კომიტეტის წევრებსაც მიმართავს და აღნიშნულ ფაქტზე სწორად რეაგირებისკენ მოუწოდებს.
"მე მოვუწოდებ ყველას, მიიღოს თავისი გადაწყვეტილება, არ ვახორციელებ ზეწოლას ოლიმპიურ კომიტეტზე, ეს მათი გადასაწყვეტი უნდა იყოს, მაგრამ ისინი გარდა იმისა, რომ ოლიმპიური კომიტეტი არიან, არიან ქართველები და ქართველს უნდა ჰქონდეს სწორი რეაქცია,"- აღნიშნა სააკაშვილმა.
შეგახსენებთ, გუშინ გავრცელებული ინფორმაციის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება. ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.
