როგორც არეშიძემ "ჯი-ეიჩ-ენთან" საუბრისას აღნიშნა, ქართულმა მხარემ სოჭის ოლიმპიადაში მონაწილეობის მიღების საკითხი პოლიტიკური მიზანშეწონილობიდან გამომდინარე უნდა გადაწყვიტოს.

"მე ყოველთვის ვამბობდი, რომ ოლიმპიადაში მონაწილეობის საკითხი უნდა განვიხილოთ პოლიტიკური მიზანშეწონილობიდან გამომდინარე - თუ გვჭირდება მასში მონაწილეობა, უნდა მივიღოთ და თუ არ გვჭირდება, არ უნდა მივიღოთ. რისთვის გვჭირდება - ამასაც მნიშვნელობა აქვს,"- განაცხადა არეშიძემ.

ამასთან, ექსპერტის თქმით, მან მოიძია ინფორმაცია ნაჩაევის შესახებ და მისთვის უცნობია, თუ რა დამსახურებისთვის მიენიჭა აღნიშნულ პირს რუსეთის გმირის წოდება.

"მე ვიცი ვინც არის ნაჩაევი. ჩემთვის ცნობილია, როგორ მოხდა 11 აგვისტოს მისი თვითმფრინავის დაზიანება, როგორ გაეთიშა ორივე ძრავი და როგორ დაჯდა მერე სვერლოვსკის აეროდრომზე. სიმართლე გითხრათ, გმირობა რაში მისცეს ვერ გავიგე. ამ საკითხის გაპიარებაც კი შეუძლია ნებისმიერ მხარს, მათ შორის ქართულსაც. ის იმ კატეგორიას განეკუთვნება, ვისაც გმირის წოდება არარსებულ ქართულ ფლოტთან ომისთვის ჩამოურიგეს, მან დავალება ვერ შეასრულა, პრაქტიკულად ვერაფერს მიაღწია და დაბრუნდა უკან. ვინც იომა ისინი კი - გაყარეს ჯარიდან. ეს ჩვენი საქმე არ არის, თავიანთ თავს უნდა მიხედონ, მაგრამ ჩემთვის საინტერესო იყო ერთი რამ, რომ იყო თუ არა ეს ადამიანი სპორტსმენი. მე გავარკვიე, რომ გაერთიანებული ყოფილა რაღაც სპორტულ საზოგადოებაში და არც ის გამიკვირდება, რომ უცებ აღმოჩნდეს რომელიმე ნაციონალური სპორტული კლუბის წევრი"- განუცხადა "ჯი-ეიჩ-ენს" მამუკა არეშიძემ.

რაც შეეხება ოლიმპიადის მეჩირაღდნეთა სიაში ივან ნაჩაევის ჩასმით რუსეთის ფედერაციის მიზანს, არეშიძე მიიჩნევს, რომ აღნიშნული გადაწყვეტილება მხოლოდ საქართველოს დამცირებას ემსახურება.

"ის რომ გამიზნულად არის ჩასმული მეჩირაღდნეთა სიაში, ეს ფაქტია. და ამის მიზანი დამცირებაა. გარდა ამისა, დემონსტრირება იმისა, რომ რუსი მეომრები და ხალხი ერთიანია. სხვათა შორის, ეს იმის ჩვენბის მცდელობაც იქნება, რომ რუსეთის გმირებს მიაქვთ ოლიმპიური ჩირაღდანი და გარკვეული მესიჯია არა მხოლოდ ქართველებისთვის, არამედ კავკასიელებისთვისაც. ეს არის იმის დემონსტრირება, რომ რუსეთისთვის პოლიტიკური დელიკატურობა არაფერს ნიშნავს და არის ჩვენება იმისა, რომ მას შეუძლია ყველაფერი,"- განმარტა არეშიძემ.

ქართული მხარის მიერ სოჭში დაგეგმილი ზამთრის ოლიმპიური თამაშების შესაძლო ბოიკოტირების საკითხზე საუბრისას არეშიძე განმარტავს, რომ აღნიშნულ გადაწყვეტილებას შესაძლოა, უამრავი სანქცია მოჰყვეს, თუმცა თუ საქართველოს პოლიტიკურად უღირს სანქციების დაკისრებაც არ წარმოადგენს მნიშვნელოვან პრობლემას.

"სანქციები ძალიან ბევრი შეიძლება იყოს, გარიცხვები, წევრობის შეჩერება და უამრავი სხვა. ბოიკოტს რომ აცხადებ, ამ ამბავმა უნდა გაიჟღეროს და ამის გაკეთება ჩვენს დასავლელ მოკავშირებს შეუძლიათ, მაგრამ მეორე ხაკითხია რამდენად მოახერხებენ ამას. სანქციებზე ნუ ვიფიქრებთ, თუ ოლიმპიადის ბოიკოტირება გვიღირს, ასეც უნდა გავაკეთოთ და ჩემთვის კითხვათა კითხვაა - გვიღირს რო მონაწლილეობის მიღება?! ამ კითხვაზე პასუხი არ მაქვს, რადგან მთავრობის წარმომადგენელი არ ვარ,"- დასძინა არეშიძემ.

რაც შეეხება სოჭის ოლიმპიადაში რუსეთის მიერ დამოუკიდებელ რესპუბლიკებად აღიარებული აფხაზეთის და სამხრეთ ოსეთის ცალკე სახელმწიფოებად მონაწილეობის საკითხს, არეშიძე აცხადებს, რომ მსგავსი რამ პრაქტიკულად შეუძლებელია, რადგან ამ საკითხს საერთაშორისო ოლიმპიური კომიტეტი განსაზღვრავს და არა - რუსეთი.

"აფხაზეთის და სამხრეთ ოსეთის ცალკე სახელმწიფოებად მონაწილეობა გამორიცხულია. მაგრამ ნუ დაგვავიწყდება, რომ ტაივანი მონაწილეობს ოლიმპიურ თამაშებში და ამხელა ჩინეთმა ვერაფერი მოუხერხა წლების განმავლობაში. ჩვენ შეგვიძლია ვიყოთ აბსოლუტურად მშვიდნი ამ სიტუაციაში, არ შევიმჩნიოთ და გავაპიაროთ ის ფაქტი, რომ ჩამოგდებული თვითმფრინავის მეჩირაღდნეა ის გმირი, რომელსაც დაარბენინებენ ჩირაღდანს აქეთ-იქით. ჩვენ უნდა ვიყოთ ჩვენს საქმეზე ორიენტირებულნი და უნდა გამოვიდეთ პოლიტიკური მიზანშეწონილობიდან. თუ საქმეს სჭირდება ოლიმპიადაში მონაწილეობა, მივიღოთ და თუ არ სჭირდება არ მივიღოთ,"- განაცხადა არეშიძემ.

ცნობისთვის, დღეს გავრცელებული ინფორმაციის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება. ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.