"ფაქტი ერთია - ბატონი პუტინი თავისი ამღვრეული ფანტაზიით არ იშურებს რაიმე ნაბიჯის გადადგმას იქითკენ, რომ საქართველომ სოჭის ოლიმპიადაში მონაწილეობაზე უარი განაცხადოს,"- ამის შესახებ ექსპერტმა სოსო ცისკარიშვილმა დღეს გავრცელებული იმ ინფორმაციის კომენტირებისას ისაუბრა, რომლის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება.
როგორც ცისკარიშვილმა "ჯი-ეიჩ-ენთან" საუბრისას აღნიშნა, "თანდათან დამცირებების ახალი სახეობა არის წარმოჩენილი პუტინის მიერ, საქართველოს მხრიდან კი, საბოლოო გადაწყვეტილებას მიიღებს ადამიანი, რომლის ჯერ არც გვარი ვიცით, არც მიდრეკილებები და არც პოლიტიკური ხედვა".
"ეს გახლავთ მომავალი პრემიერ-მინისტრი. მის მაგივრად ნუ ვისაუბრებთ, მაგრამ მე რომ დამასახელონ პრემიერ-მინისტრად, თავს შევიკავებდი ასეთ ოლიმპიადაში მონაწილეობისგან და ამას ვიდრე განვაცხადებდი, ინტენსიურ კონსულტაციებს გავივლიდი საერთაშორისო ოლიმპიურ კომიტეტთან. ისინი ვალდებულები არიან რეაგირება გააკეთონ ასეთ მზაკვრულ გამოწვევებზე,"- განაცხადა სოსო ცისკარიშვილმა.
რაც შეეხება ქართული მხარის მიერ სოჭის ოლიმპიადაში მონაწილეობაზე უარის თქმას, ცისკარიშვილი მიიჩნევს, რომ ეს არავითარ პრობლემას არ შექმნის და აღნიშნული გადაწყვეტილების მაქსიმალური "სასჯელი" შესაძლოა, საქართველოსთვის რუსული ემბარგოს დაწესება იქნას.
"ვერანაირ უარყოფით სერიოზულ შედეგს ვერ ვხედავ, შეიძლება მოლდოვის წინააღმდეგ გამოყენებული პროვოკაციული ემბარგოს მაგვარი მივიღოთ. ჩემი აზრით, ბევრად უფრო მნიშნელოვანია ჩვენი ქვეყნის ხელისუფლების წონასწორობიდან გამოყვანის მცდელობა ვილნიუსის სამიტის წინ და ჯერ ადრეა იმაზე მსჯელობა მივიღებთ თუ არა მონაწილეობას ოლიმპიურ თამაშებში. ამის გადაწყვეტა იანვრის ბოლოსაც შეგვეძლება. მანამდე უნდა გვახსოვდეს, რომ ვილნიუსის სამიტამდე რუსეთის მხრიდან გადადგმული ყოველგვარი მზაკვრული ნაბიჯი სწორედ საქართველოსთის პოზიტიური შედეგის არდადგომისკენ არის მიმართული და არ უნდა დავკარგოთ წონასწორობა, იანვრის ბოლომდე ოლიმპიადა როგორც თემა, დავივიწყოთ,"- განუცხადა "ჯი-ეიჩ-ენს" ცისკარიშვილმა.
ცნობისთვის, დღეს გავრცელებული ინფორმაციის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება. ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.
