რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძის განცხადებით, დღეს გავრცელებულ ინფორმაციაზე რეაგირების თაობაზე, რომლის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება, საქართველოს მთავრობას ჯერ-ჯერობით ჩამოყალიბებული პოზიცია არ აქვს.
როგორც აბაშიძემ "ჯი-ეიჩ-ენთან" საუბრისას განმარტა, აღნიშნული საკითხი სათანადო დონეზე ოპერატიულად იქნება განხილული და შესაბამისი პოზიციაც ამის შემდეგ გახდება ცნობილი.
"გავეცანით აღნიშნულთან დაკავშირებით ინფორმაციას, მოვისმინეთ ყველაფერი და მხოლოდ ინფორმაციის შეჯერების შემდეგ იქნება შესაბამისი გადაწყვეტილება მიღებული. ჯერ-ჯერობით ამაზე მეტის თქმა არ შემიძლია, მოგეხსენებათ კვირა დღეა და საკითხის შესაბამის დონეზე განხილვა უნდა მოხდეს, რის შემეგადაც შევჯერდებით და გავაკეთებთ განცხადებას,"- განუცხადა "ჯი-ეჩ-ენს" ზურაბ ამაშიძემ.
ცნობისთვის, დღეს გავრცელებული ინფორმაციის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება. ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.