საქართველოს ეროვნული ოლიმპიური კომიტეტი სოჭის ოლიპიადაში მონაწილეობის მიღების საკითხს არ გადახედავს.
როგორც ოლიმპიური კომიტეტის საზოგადოებასთან ურთიერთობის სამსახურის ხელმძღვანელმა კახა ბერიძემ აღნიშნა, თავისთავად არასასიამოვნოა, როდესაც მეჩირაღდნე საქართველოს წინააღმდეგ მებრძოლი მფრინავი იქნება, თუმცა ეს ფაქტი სოჭის ოლიმპიადაში ქართველი სპორტსმენების მონაწლეობის საკითხზე გავლენას არ იქონიებს.
"რა თქმა უნდა არასასიამოვნო ფაქტია, როდესაც იმ პიროვნებას, რომელიც მონაწილეობდა შენი ქვეყნის წინააღმდეგ აგრესიაში და ბომბავდა შენს ქვეყანას, მიანიჭეს უფლება, რომ ოლიმპიური ჩირაღდანი დაეჭირა ხელში. ის, რომ ამ ფაქტმა ძეიძლება გავლენა იქონიოს ქართველი სპორტსმენების და ზოგადად საქართველოს დელეგაციის სოჭის ოლიმპიურ თამაშებში მონაწილეობაზე, ამ ეტაპზე რა თქმა უნდა გამორიცხულია. გადაწყვეტილება უკვე მიღებულია,"- განაცხადა კახა ბერიძემ.
საკითხზე განმარტება საქართველოს სპორტისა და ახალგაზრდულ საქმეთა მნისტრის მოადგილემ თამაზ თევზაძემაც გააკეთა და აღნიშნა, რომ ოლიმპიური ქარტიიდან გამომდინარე, ესტაფეტაში მონაწილეობის მიღება ნებისმიერ მოქალაქეს შეუძლია.
"გმირი არ არის ის, ჩვენთვის მტერია. ახლა ესტაფეტაში მონაწილეობა ოლიმპიური ქარტიიდან გამომდინარე ნებისმიერ მოქალაქეს შეუძლია მიიღოს - არა მარტო რუსეთის, ის გმირი იქნება, ბავშვი იქნება შეზღუდული შესაძლებლობების მქონე ოლიმპიური ჩემპიონი, პოლიტიკოსი თუ რიგითი სპორტსმენი. ეს მათი გადასაწყვეტია. რასაც ახლა აკეთებენ ჩვენს ტერიტორიებზე, მავთულხლართებს და თხრლებს აკეთებენ, მორაკლში არ ჯდება რასაკვირველია, რა შემიძლია გითხრათ?!,"- განაცხადა თამაზ თევზაძემ.
აღნიშნულ ფაქტს საქართველოს პრეზიდენტი მიხეილ სააკაშვილიც გამოეხმაურა. მისი თქმით, "პუტინი სოჭის ოლიმპიადას აუცილებლად გამოიყენებს აფხაზეთის და ცხინვალის იდეის პოპულარიზაციისთვის და არ გაუშვებს არც ერთ შანსს რომ საქართველო მაქსიმალურად დაამციროს".
ქვეყნის პირველი პირი საქართველოს ოლიმპიური კომიტეტის წევრებსაც მიმართავს და აღნიშნულ ფაქტზე სწორად რეაქგირებისკენ მოუწოდებს.
"მე მოვუწოდებ ყველას, მიიღოს თავისი გადაწყვეტილება, არ ვახორციელებ ზეწოლას ოლიმპიურ კომიტეტზე, ეს მათი გადასაწყვეტი უნდა იყოს, მაგრამ ისინი გარდა იმისა, რომ ოლიმპიური კომიტეტი არიან, არიან ქართველები და ქართველს უნდა ჰქონდეს სწორი რეაქცია,"- აღნიშნა სააკაშვილმა.
სოჭის ოლიმპიადაზე მეჩირაღდნედ რუსი სამხედრო მფრინავის წარდგენის თემაზე კომენტარი პრეზიდენტის ადმინისტრაციის ხელმძღვანელმა ანდრო ბარნოვმაც გააკეთა და განაცხადა, რომ საქართველოს პრემიერ-მინისტრი და მისი საპრეზიდენტო კანდიდატი მზად არიან ხელი შეაშველონ ოკუპანტს ჩირაღდნის ანთებაში".
რეინტეგრაციის საკითხებში სახელმწიფო მინისტრი პაატა ზაქარეიშვილი კი მიიჩნევს, რომ "მიუხედავად ყველაფრისა, რაც მოხდა, რეგიონული უსაფრთხოებიდან გამომდინარე, საერთაშორისო ჩართულობიდან გამომდინარე და საქართველოს პრესტიჟიდან გამომდინარე, ქვეყანამ ოლიმპიადაში მონაწილეობა უნდა მიიღოს".
ამასთან, ზაქარეშვილი აცხადებს, რომ "თუ დავიწყებთ ჩხირკედელაობას ვის ეჭირება ჩირაღდანი ხელში და ამის გამო ჩვენი პოზიციების გადახედვას დავიწყებთ, არასწორი იქნება".
ცნობისთვის, რუსი სამხედრო მფრინავი ივან ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.