"პუტინი არ გაუშვებს არც ერთ შანსს რომ მაქსიმალურად დაგვამციროს,"- ამის შესახებ საქართველოს პრეზიდენტმა მიხეილ სააკაშვილმა დღეს გავრცელებული იმ ინფორმაციის კომენტირებისას ისაუბრა, რომლის თანახმად, სოჭის ოლიმპიადის ერთ-ერთი პირველი მეჩირაღდნე 2008 წლის რუსეთ-საქართველოს ომში მონაწილე სამხედრო მფრინავი ივან ნაჩაევი იქნება.
"პუტინის რუსული იმპერიული არასრულფასოვნების კომპლექსიდან გამომდინარე, იგი ყველაფერს გააკეთებს, რომ საქართველოს თავი უბრალოდ, ჩააყოფინონ ტალახში და დარწმუნებული ვარ, რომ ეს გამიზნულადაა გაკეთებული ისევე, როგორც გამიზნულად ჩამოიყვანენ იქ აფხაზეთის და სახმრეთ ოსეთის ე.წ. დელეგაციებს, ოლიმპიადის სტუმრებს ექსკურსიაზე წაიყვანენ აფხაზეთში, ჩვენი ნებართვის გარეშე გამოიყენებენ აფხაზეთის ინფრასტრქტურას და ამ ყველაფერს და იმაზე მეტს გააკეთებს, ვიდრე წარმოგვიდგენია. ამ ოლიმპიადას აუცილებლად გამოიყენებს აფხაზეთის და ცხინვალის იდეის პოპულარიზაციისთვის,"- განაცხადა მიხეილ სააკაშვილმა.
ქვეყნის პირველი პირი საქართველოს ოლიმპიური კომიტეტის წევრებსაც მიმართავს და აღნიშნულ ფაქტზე სწორად რეაქგირებისკენ მოუწოდებს.
"მე მოვუწოდებ ყველას, მიიღოს თავისი გადაწყვეტილება, არ ვახორციელებ ზეწოლას ოლიმპიურ კომიტეტზე, ეს მათი გადასაწყვეტი უნდა იყოს, მაგრამ ისინი გარდა იმისა, რომ ოლიმპიური კომიტეტი არიან, არიან ქართველები და ქართველს უნდა ჰქონდეს სწორი რეაქცია,"- აღნიშნა სააკაშვილმა.
ცნობისთვის, რუსი სამხედრო მფრინავი ივან ნაჩაევი 2008 წლის აგვისტოში საქართველოში "სუ 25"-ის ტიპის თვითმფრინავით საბრძოლო დავალებებს ასრულებდა. აღნიშნული ომის შემდეგ მას რუსეთში გმირის წოდებაც მიენიჭა.
