"ნაციონალური მოძრაობა" არასოდეს დაადგება რევანშიზმის და სამაგიეროს გადახდის გზას,"- ამის შესახებ პრეზიდენტობის კანდიდატმა, პარტიის პოლიტიკური საბჭოს ახლადარჩეულმა თავმჯდომარემ დავით ბაქრაძემ სპორტის სასახლეში დღეს გამართულ ყრილობაზე სიტყვით გამოსვლისას ისაუბრა.
ბაქრაძის თქმით, "ნაციონალურ მოძრაობას" არ ჰყავს მტრები საქართველოს შიგნით და ქვეყანას სჭირდება თითოეული მოქალაქის პრეზიდენტი, რომელიც ხალხთან ერთად გააკონტროლებს მთავრობას, რათა წინასაარჩევნოდ გაცემული ყველა დაპირება შესრულებულ იქნეს".
"ჩვენ გვჭირდება თითოეული მოქალაქის პრეზდენტი და არა - მხოლოდ მისი პარტიული მომხრეების პრეზიდენტი. თქვენ მომეცით მანდატი წარმოვადგინო ჩვენი პარტია და ეს არის ჩვენი ხალხის შერიგების, გამთლიანების და ერთიანობის მანდატი. ხალხი დაიღალა მუდმივი დაპირისპირების, შუღლის და დაძაბულობისგან, შევწყვიტოთ ეს დაპირისპირება და მთელი ჩვენი ენერგია მოვახმაროთ ქვეყნის განვითარებას და ხალხის უკეთ ცხოვრებას. მაშინ, როდესაც ჩვენ, პოლიტიკოსები მთლიანად დაკავებული ვართ ერთმანეთთან ჩხუბით, გვავიწყდება, რომ ხალხს სჭირდება დასაქმება, სამუშაო ადგილები, გაზრდილი პენსია, სოფლის განვითარება, აშენებული ინფრასტრუქტურა, წესრგი და ევროპული მომავალი. ამიტომ გთავაზობთ ვიმუშაოთ ერთად ქვეყნის განვითარებისთვის და თუ დღევანდელ მთავობას არ ყოფნის გამოცდილება, რომ თავიდან აიცილოს ეკონომიკური კრიზისი, ჩვენ, როგორც მთავარი ოპოზიციური ძალა, მზად ვართ ვიმუშაოთ მასთან ერთად, შევასრულოთ კონსტრუქციული როლი და ვაკონტროლოთ მთავრობა ხალხის ინტერესიდან გამომდინარე. სწორედ ეს უნდა იყოს ქვეყნის მომავალი პრეზიდენტის ფუნქცია, რომ გააკონტროლოს მთავრობა ხალხთან ერთად, რომ მთავარი ენერგია და რესურსი მთავრობამ დახარჯოს საარჩევნო დაპირებების შესასრულებლად. ოცნება არ მუშაობს, დაპირებები არ სრულდება და ამას დღეს ყველა ხედავს,"- განაცხადა დავით ბაქრაძემ.
