პატიმრობაში მყოფი ყოფილი შინაგან საქმეთა და ექს-პრემიერ მინისტრი ვანო მერაბიშვილი სპორტის სასახლეში მიმდინარე "ნაციონალური მოძრაობის" დღევანდელ ყრილობასთან დაკავშირებით საგანგებო განცხადებას ავრცელებს.
მერაბიშვილის მიმართვის ტექსტს "ჯი-ეიჩ-ენი" უცვლელად გთავაზობთ:
"მინდა მივესალმო „ერთიანი ნაციონალური მოძრაობის" დღევანდელ ყრილობას და საქართველოს სხვადასხვა რეგიონიდან მასზე წარმოდგენილ პარტიის დელეგატებს. მინდა ხაზი გავუსვა, რომ ეს არ იქნება პარტიის ერთ-ერთი რიგითი ყრილობა. დღევანდელ შეხვედრაზე უნდა დამტკიცდეს პარტიის ახალი წესდება, რომელიც წარმოადგენს პარტიის გაჯანსაღებისკენ და უფრო მეტი დემოკრატიულობისკენ და გამჭვირვალობისკენ გადადგმულ დიდ ნაბიჯს. ახალი წესდებით პარტია გადავა მართვის სრულიად ახალ სისტემაზე, სადაც ყველა მმართველობითი რგოლის წარმომადგენელი იქნება არჩეული, რაც საშუალებას მისცემს პარტიის თითოეულ წევრს უფრო მეტად იყოს ჩართული გადაწყვეტილებების მიღებაში და შესაბამისად მეტი პასუხისმგებლობა აიღოს მიღებულ გადაწყვეტილებებზე. მე დარწმუნებული ვარ, რომ დღევანდელ ყრილობაზე მიღებული გადაწყვეტილებებით და მათ საფუძველზე მომავალი საქმიანობით, „ერთიანი ნაციონალური მოძრაობა" დაამტკიცებს, რომ წარმოადგენს საქართველოში ყველაზე პროგრესულ, დემოკრატიულ და გამჭვირვალე პარტიას. მინდა წარმატება ვუსურვო დღევანდელი ყრილობის ყველა მონაწილეს, პარტიაში ყველა პოზიციაზე ახლად არჩეულ პირს და პარტიის ყველა მხარდამჭერს", - ნათქვამია ვანო მერაბიშვილის განცხადებაში.
ცნობისთვის, თბილისში, სპორტის სასახლეში "ნაციონალური მოძრაობის" ყრილობა მიმდინარეობს.
პარტიის წევრთა ინფორმაციით, დღევანდელ შეკრებაზე სხვადასხვა სიახლეები გაჟღერდება და პარტია საზოგადოებას განახლებულ გეგმებს წარუდგენს.
ამასთან, "ნაციონალური მოძრაობის" დღევანდელ ყრილობაზე პარტიის თავმჯდომარესაც აირჩევენ, რაც შეეხება გენერალური მდივნის პოსტს, მას ისევ პატიმრობაში მყოფი მოქმედი გენმდივანი ვანო მერაბიშვილი შეინარჩუნებს.
სპორტის სასახლეში მიმდინარე "ნაციონალური მოძრაობის" ყრილობას დედაქალაქში მცხოვრებ პარტიის მხარდამჭერებთან ერთად, რეგიონებიდან ჩამოსული მოსახლეობაც ესწრება.