,არჩევნებისა და პოლიტიკური ტექნოლოგიების კვლევის ცენტრის" ხელმძღვანელი კახა კახიშვილი მიიჩნევს, რომ კონტროლის პალატამ პრეზიდენტის ადმინისტრაციის ქმედების გამო მოკვლევა უნდა დაიწყოს. როგორც ,,ჯი-ეიჩ-ენთან" საუბარში კახიშვილმა პრეზიდენტის ადმინისტრაციის გამოქვეყნებული შედეგების კომენტირებისას განაცხადა ,,ნაციონალურმა მოძრაობამ" საარჩევნო კამპანიისთვის ირიბი გზით გამოიყენა პრეზიდენტის ადმინისტრაცია და მისი ბიუჯეტი.
,,ახლა როცა გამკაცრდა საარჩევნო კამპანიის ფონდის დაფინანსების წესები, ფაქტობრივად, ,,ნაციონალური მოძრაობა" ხელისუფლებაში არ არის და ვერ იზიდავს იმ თანხებს, რაც საარჩევნო კამპანიისთვის სჭირდებოდა, ამიტომ მიიჩნიეს, რომ შეუძლიათ საბიუჯეტო ფონდიდან დააფინანსონ წინასაარჩევნო აქტიობები. ამ მიზნით მათ გამოიყენეს პრეზიდენტის ადმინისტრაცია და მისი ბიუჯეტი. ამ მოქმედებაში პირდაპირ იკვეთება ,,ერთიანი ნაციონალური მოძრაობის" პარტიული ინტერესები, რაც გამოიხატება საარჩევნო კამპანიის ფონდის გვერდის ავლით საარჩევნო აქტიურობების დაფინანსებაში საბიუჯეტო თანხებით, აღნიშნულით კი დაირღვა კანონი "მოქალაქეთა პოლიტიკური გაერთიანების შესახებ" და საქართველოს საარჩევნო კოდექსის მოთხოვნები. წესით კონტროლის პალატამ უნდა დაიწყოს მასალების შესწავლა", _განაცხადა ,,ჯი-ეიჩ-ენთან" საუბარში კახა კახიშვილმა.
მისივე განმარტებით, გამოქვეყნებული შედეგებით ,,ნაციონალურ მოძრაობას" საზოგადოებრივი აზრის ფორმირება სურს.
,,პრეზიდენტის ადმინისტრაციის მიერ გამოქვეყნებული შედეგებით საზოგადოებრივი აზრის მანიპულირება ხდება, ძირითადად უცხოელების. ეს კვლევა გაიგზავნება საერთაშორისო ორგანიზაციებში, მიაწვდიან უცხოელ ჟურნალისტებს და დაანახებენ, თითქოს, მათი საპრეზიდენტო კანდიდატს დავით ბაქრაძეს მეორე ადგილზე გასვლის დიდი შანსი აქვს, მაგრამ კოალიცია ,,ქართული ოცნების" საპრეზიდენტო კანდიდატი გიორგი მარგველაშვილი კი პირველსავე ტურში გასამარჯვებლად საკმარის ხმებს ვერ აგროვებს. რაც მთავარია ,,Greenberg, Quinlan, Rosner Research არის ის კომპანია რომელიც, თითქმის, ყველა არჩევნებზე ,,ნაციონალური მოძრაობის" კონტრაქტორია და ყოველთვის მათთვის სასურველ შედეგს დებდა", _განაცხადა ,,ჯი-ეიჩ-ენთან" საუბარში კახიშვილმა.
შგახსენებთ, რომ საქართველოს პრეზიდენტის ადმინისტრაციის დაკვეთით ამერიკულ კვლევითი კომპანიიის „გრინბერგ, ქუინლან, როზნერ რისერის (Greenberg, Quinlan, Rosner Research) მიერ ჩაატარებული საზოგადოებრივი აზრის კვლევის თანახმად, კითხვაზე ,,დღეს რომ ტარდებოდეს არჩევნები, რომელ საპრეზიდენტო კანდიდატს მისცემდით ხმას არჩევანი რომ იყოს შემდეგი"? ,,ნაციონალური მოძრაობის" საპრეზიდენტო კანდიდატს დავით ბაქარაძეს გამოკითხულთა 22% უჭერს მხარს, კოალიცია ,,ქართული ოცნების"' საპრეზიდენტო კანდიდატს გიორგი მარგველაშვილს რესპონდენტთა 43%, ,,დემოკრატიული მოძრაობის" საპრეზიდენტო კანდიდატს ნინო ბურჯანაძეს კი გამოკითხულთა 8% უჭერს მხარს, რაც შეეხება ,,ლეიბორისტული პარტიის" საპრეზიდენტო კანდიდატს შალვა ნათელაშვილს მას გამოკითხულთა 5%, ხოლო ,,ქდმ"-ს" საპრეზიდენტო კანდიდატს გიორგი თარგამაძეს რესპონდენტთა 1% უჭერს მხარს, ასევე 1% -იანი მხარდაჭერით სარგებლობას ,,ხალხის პარტიის" საპრეზიდენტო კანდიდატი კობა დავითაშვილი.
