"ნახეთ რა დრომდე მოვედით.. ვსაუბრობთ იმაზე, რომ ციხეში ვინმე არ იყოს ჩაწერილი, როცა ჩაწერილი ჰყავდათ მთელი საქართველო,"- ამის შესახებ საპარლამენტო უმრავლესობის წევრმა ზაქარია ქუცნაშვილმა შს და თავდაცვის ყოფილი მინისტრის ბაჩო ახალაიას საკანში გადაღებული ფარული ვიდეო და აუდიო ჩანაწერების გავრცელების ფაქტის კომენტირებისას ისაუბრა.
"თუ ამის სამხილი არსებობს, რა თქმა უნდა ეს კანონის დარღვევაა, თუ ეს ჭორაობაა, ამ შემთხვევაში რა თქმა უნდა, ჭორაობა იქნება და მეტი არაფერი. ადვოკატთან შეხვედრა ერთის მხრივ, ხოლო მეორეს მხრივ, პატიმართან მონახულების შეხვედრა არ შეიძლება იქნას გადაღებული, თუმცა ნახეთ რა დრომდე მოვედით.. ვსაუბრობთ იმაზე, რომ ციხეში ვინმე არ იყოს ჩაწერილი, როცა ჩაწერილი ჰყავდათ მთელი საქართველო არათუ ციხეში, არამედ გარეთ, მათ სორის პირადი ცხოვრების ამსახველი კადრები და ნუ დაგვავიწყდება ჩვენ რომ 22 000 ფაილი განადგურდა, რომელიც პირადი, უკანონო ხასიათის ჩანაწერის სახით იყო ჩაწერილი,"- განაცხადა ზაქარია ქუცნაშვილმა.
ცნობისთვის, გუშინ კახეთის საინფორმაციო ცენტრმა ბაჩო ახალაიას საკანში გადაღებული ფარული ვიდეო და აუდიო ჩანაწერები გაავრცელა. აღნიშნულთან დაკავშირებით სასჯელაღსრულების სამინისტროს ოფიციალური განცხადება ჯერ-ჯერობით არ გაუკეთებია.