საერთაშორისო სავალუტო ფონდის ტექნიკური დახმარების მისიამ საქართველოში სამუშაო ვიზიტი დაასრულა. მიმდინარე წლის 4 ოქტომბერს, საქართველოს ფინანსთა მინისტრმა ნოდარ ხადურმა მისიის ხელმძღვანელთან ენრიკო აავისთან და მისიის სხვა წევრებთან შემაჯამაბელი შეხვედრა გამართა.
სსფ-ის მისიის წარმომადგენლებმა ფინანსთა მინისტრს გააცნეს ის პროგრესი, რომელსაც ფინანსთა სამინისტრომ მიაღწია სსფ-ს მიერ ერთი წლის წინ დაწყებული ტექნიკური დახმარების პროგრამის ფარგლებში.
პროგრამა ითვალისწინებდა დახმარებას ისეთი მნიშვნელოვანი მიმართულებით, როგორიცაა: გადასახადების ადმინისტრირება და მისი გაუმჯობესების მექანიზმები, ზედმეტად გადახდილი გადასახადების უკან დაბრუნების პროცედურები, ალტერნატიული აუდიტის ეფექტიანი მუშაობისთვის აუცილებელი პირობები და სხვა.
„სსფ-ის მისია აქტიურად თანამშრომლობს ფინანსთა სამინისტროსთან სხვადასხვა მიმართულებით. აღნიშნული მისიის მიზანი იყო ფისკალური რისკების შესწავლა, აგრეთვე ისეთი საკითხი, როგორიცაა ზედმეტად გადახდილი გადასახადების დაბრუნების პროცესი. ჩვენ ვთანამშრომლობთ მათთან, ვიღებთ რეკომენდაციებს, ვიზიარებთ საერთაშორისო პრაქტიკას ამ მიმართულებით, თუმცა, ჩვენ უკვე აქტიურად გვაქვს დაწყებული ზედმეტად გადახდილი გადასახადების დაბრუნება და მომავალ წელს პროცესი უფრო აქტიური იქნება," - განაცხადა ფინანსთა მინისტრმა ნოდარ ხადურმა.
„ვიზიტის ფარგლებში საერთაშორისო სავალუტო ფონდის ფისკალური დეპარტამენტის მისიას ძალიან ნაყოფიერი შეხვედრა ჰქონდა ფინანსთა სამინისტროსა და შემოსავლების სამსახურში. ჩვენ მომავალშიც მზად ვართ ქართველ კოლეგებს გავუწიოთ რეკომენდაციები და გავაცნოთ საუკეთესო საერთაშორისო პრაქტიკა გადამხდელთა რეგისტრაციის, გადასახადების დეკლარირების კულტურის ამაღლების, გადამხდელთა მიერ დაგროვილი დავალიანებების საკითხებში. მნიშვნელოვანია, რომ საქართველოში რეფორმები ამ მიმართულებებით აქტიურად გაგრძელდეს," - განაცხადა სსფ-ის მისიის ხელმძღვანელმა ენრიკო აავიმ.
ფინანსთა სამინისტროში გამართულ შეხვედრას დაესწრნენ მინისტრის პირველი მოადგილე გიორგი თაბუაშვილი, მინისტრის მოადგილე დავით ლეჟავა, შემოსავლების სამსახურის უფროსი ლაშა ხუციშვილი, აგრეთვე სსფ-ის მუდმივი წარმომადგენელი საქართველოში აზიმ სადიკოვი.
