საპარლამენტო უმცირესობა, ბაჩო ახალაიას საკანში გადაღებულ და გამოქვეყნებულ ფარულ ვიდეომასალას ეხმაურება. უმცირესობის თქმით, აღნიშნული კანონით დაუშვებელია. „ძიების პროცესში მყოფი პატიმრისა და მისი დაცვის მხარის თვალთვალი კანონს ეწინააღმდეგება. ჩვენი მოსახლეობის სხვა მოლოდინების მიუხედავად, ხელისუფლებამ ჩვენი მოქალაქეებისა და პოლიტიკური ოპონენტების თვალთვალი აირჩია," - ამბობს უმცირესობის წევრი გია თევდორაძე. დეპუტატი სასჯელაღსრულების სამინისტროს წარმომადგენლის მიხეილ ღურწკაიას კომენტარსაც ეხმიანება, სადაც ღურწკაია ამბობდ, რომ ჩანაწერის გაკეთება თავად ახალაიას თანხმობით ხდებოდა. „რაღაც არა მგონია ბაჩო ახალაიას, დაკავებულს, მისი ყოველდღიური ცხოვრების თვალთვალი სდომოდა," - ამბობს თევდორაძე. შეგახსენებთ, რომ სასჯელაღსრულების #7 დაწესებულებაში გადაღებული ფარული ვიდეომასალა კახეთის საინფორმაციო ცენტრმა გაავრცელა. ცენტრის ინფორმაციით, ვიდეომასალა რამდენიმესაათიანია და ის 2012 წლის ნოემბერშია ჩაწერილი.