"არ აქვს მნიშვნელობა ახალაიას წინაშე დაარღვევენ კანონს თუ ვიქტორ დოლიძის წინააღმდეგ. ეს თუ დადასტურდა, რა თქმა უნდა პასუხისმგებლობის საკითხი უნდა დადგეს,"- ამის შესახებ საპარლამენტო უმრავლესობის წევრმა ვიქტორ დოლიძემ შს და თავდაცვის ყოფილი მინისტრის ბაჩო ახალაიას საკანში გადაღებული ფარული ვიდეო და აუდიო ჩანაწერების გავრცელების ფაქტის კომენტირებისას ისაუბრა.
"ნებისმიერი კანონი თუკი დაირღვა, ეს იქნება ახალაიასთან მიმართებაში თუ ნებისმიერ სხვა ვინმესთან მიმართებაში, რა თქმა უნდა, უნდა დაისვას საკითხი და უნდა გაირკვეს, აქ ორი აზრი არ არსებობს. ჩემთვის არ აქვს მნიშვნელობა ახალაიას წინაშე დაარღვევენ კანონს თუ ვიქტორ დოლიძის წინააღმდეგ. ეს თუ დადასტურდა, რა თქმა უნდა პასუხისმგებლობის საკითხი უნდა დადგეს,"- განაცხადა ვიქტორ დოლიძემ.
ცნობისთვის, გუშინ კახეთის საინფორმაციო ცენტრმა ბაჩო ახალაიას საკანში გადაღებული ფარული ვიდეო და აუდიო ჩანაწერები გაავრცელა. აღნიშნულთან დაკავშირებით სასჯელაღსრულების სამინისტროს ოფიციალური განცხადება ჯერ-ჯერობით არ გაუკეთებია.
