იპოთეკით დაზარალებული ადამიანების დროებით გამოსახლებების შეჩერებასთან დაკავშირებული კანონპროექტის განხილვის განახლების მიზნით, პარლამენტი მთავრობასთან მოლაპარაკებებს აწარმოებს. ამისა შესახებ საპარლამენტო უმრავლესობის წევრმა გედევან ფოფხაძემ განაცხადა. დეპუტატის თქმით, ის და უმრავლესობის წევრი პაატა კიკნაველიძე კონსულტაციების პროცესში არიან ჩართული. როგორც ფოფხაძე ამბობს, გარკვეულ საკითხებზე სიტყვიერი შეთანხმება არსებობს, მაგალითად, იმაზე, რომ კანონმდებლობა უნდა შეიცვალოს.
„ადამიანების სახლებიდან გამოსახლება მათი უფლებების შემლახველად არ უნდა იქცეს. მთავრობა მუშაობს და დეკემბრამდე შემოვა ეს კანონპროექტი, მაგრამ თუ მთავრობამ დააგვიანა, ჩვენ მოვახდენთ ინიცირებას," - ამბობს დეპუტატი. შეგახსენებთ, რომ კანონპროექტი, რომელიც გამოსახლებების 6 თვით შეჩერებას ითვალისწინებს, პარლამენტმა პირველი მოსმენით მიიღო. ამის შემდეგ მთავრობის უარყოფითი დასკვნის გამო, კანონპროექტის განხილვა შეჩერდა. აღნიშნულს იპოთეკური სესხებით დაზარალებულთა მიერ პარლამენტთან გამართული შიმშილობის აქციები მოჰყვა.
