მთავრობამ, 2014 წლისთვის მშპ-ს რეალური ზრდის პროგნოზი 5%-ით, ხოლო მშპ-ს დეფლატორი 3.5%-ით განსაზღვრა. როგორც "ქვეყნის ძირითადი მონაცემები და მიმართულებები 2014-2017 წლებისათვის" დოკუმენტის პროექტშია აღნიშნული, მაკროეკონომიკური მაჩვენებლებიდან გამომდინარე 2014 წლის ნომინალური მშპ-ს 31 164,7 მლნ ლარს შეადგენს. დოკუმენტის მიხედვით, საგადასახადო შემოსავლების გაანგარიშებისას გათვალისწინებულ იქნა მაკროეკონომიკური პროგნოზები და საგადასახადო კოდექსში განხორციელებული ცვლილებები. კერძოდ, 2013 წლიდან შემოღებული იქნა დაუბეგრავი მინიმუმი დაქირავებული ფიზიკური პირის საშემოსავლო გადასახადზე, შესაბამისად აღნიშნული ცვლილება იწვევს 2014 წლის ბიუჯეტში საშემოსავლო გადასახადიდან მისაღები შემოსავლის 180.0-200.0 მლნ ლარით შემცირებას. აგრეთვე 2014 წლის ბიუჯეტში გათვალისწინებულია თამბაქოს აქციზის 60 თეთრიდან 75 თეთრამდე ზრდის ეფექტი, რის შედეგადაც მოსალოდნელია თამბაქოს აქციზიდან 50.0 მლნ ლარით მეტის მიღება. მაკროეკონომიკური პროგნოზებისა და საგადასახადო პოლიტიკაში განხორციელებული ცვლილებებიდან გამომდინარე, 2014 წელს ნაერთი ბიუჯეტის საგადასახადო შემოსავლების მაჩვენებელი 7 380,0 მლნ ლარს შეადგენს