საქართველოში ოფიციალური ვიზიტით მსოფლიო პალატების ფედერაციის თავმჯდომარე, პარიზის საერთაშორისო სავაჭრო პალატის და სლოვაკეთის რესპუბლიკის სავაჭრო-სამრეწველო პალატის პრეზიდენტი პიტერ მიჰოკი იმყოფება. ვიზიტის ფარგლებში უკვე გაიმართა შეხვედრები სამთავრობო სტრუქტურებთან, სავაჭრო-სამრეწველო პალატის პრეზიდენთან.
სავაჭრო-სამრეწველო პალატაში გამართული შეხვედრის შემდეგ პიტერ მიჰოკმა განაცხადა, რომ მისი ვიზიტის მთავარი მიზანი მცირე და საშუალო ბიზნესის ხელშეწყობაა. მისი თქმით, საქართველოს მსგავს მცირე მასშტაბის ბაზარზე მცირე და საშუალო საწარმოების განვითარება მნიშვნელოვანია.
"მიმაჩნია, რომ ამ მასშტაბის მქონე ქვეყნისთვის გადამწყვეტ როლს, სწორედ მცირე და საშუალო საწარმოების განვითარება თამაშობს,"- აღნიშნა პიტერ მიჰოკმა. მსოფლიო პალატების ფედერაციის პრეზიდენტმა ქვეყნისთვის სხვადასხვა პრიორიტეტული მიმართულებების ხელშეწყობაზეც ისაუბრა, რისთვისაც მნიშვნელოვანია, რომ ქართული კომპანიები ჩაერთონ პალატების ერთიან გლობალურ ქსელში.
მსოფლიო პალატების ფედერაციის პრეზიდენტის ვიზიტს დადებითად აფასებს საქართველოს სავაჭრო-სამრეწველო პალატის პრეზიდენტი. კახა ბაინდურაშვილის განმარტებით, ეს ხელს შეუწყობს საქართველოს საინვესტიციო პოტენციალის შესახებ ბიზნეს-გაერთიანებების ინფორმირებას.
კახა ბაინდურაშვილის თქმით, უახლოეს მომავალში შედგება ქართველი ბიზნესმენების ვიზიტი მსოფლიო პალატების გაერთიანებაში, რაც კონკრეტული ბიზნეს-პროექტების განხორციელების კუთხით წინ გადადგმული ნაბიჯი იქნება.
