"ტელევიზიებისადმი ყველაზე დიდი პრეტენზია ის არის, რომ ჟურნალისტები ჩაკითხვას ვერ ახერხებენ,"- ამის შესახებ საქართველოს პრემიერ-მინისტრმა ბიძინა ივანიშვილმა ცენტრალური ტელეკომპანიების საინფორმაციო სამსახურების უფროსებთან და პოლიტიკური თოქ-შოუების წამყვანებთან შეხვედრაზე ისაუბრა.
ივანიშვილის თქმით, ხშირად პოლიტიკურ გადაცემებში დაბალანსებულობის გამო, სტუმრები არასწორად არიან შერჩეულები, რადგან ხშირ შემთხვევაში ერთ მხარეს მუდმივად ერთი და იგივე, დემაგოგი რესპოდენტია.
"მე მინდა ვისაუბრო ტელევიზიებზე, როცა რესპონდენტები ამბობენ, რაც სურთ და ჟურნალისტები არ ახერხებენ ჩაკითხვას, რომ დააზუსტონ პოზიცია, რომელსაც ცალმხრივად პასუხობს რესპონდენტი და ეს არის ძირითადი პრეტენზია ტელევიზიებისადმი. პრეტენზია შეიძლება, ცოტა მძიმე სიტყვაა, უფრო სურვილს დავარქმევდი, რომ რესპოდენტებს უნდა ჩაეკითხოთ და ჩააზუსტოთ ინფორმაცია, რომელიც ცალმხრივია. ისეთ რამეებს საუბრობს სააკაშვილი „რუსთავი 2"-სა და „იმედზე", რომ იქ სანაიაც და „იმედის" ჟურნალისტებიც ელემენტარულ კითხვებს არ სვამენ და ეს გასაოცარია. მე არ ვაპირებ დღეს „რუსთავი 2"-თან პოლემიკაში შესვლას. კიდევ ერთი რამ, რაც შესამჩნევია და სასურველია, შეიცვალონ, ის არის, რომ ხშირად ტელევიზიები ცდილობენ ბალანსის დაცვას და მოჰყავთ რესპონდენტები ორი მხრიდან, ძალიან ხშირად რესპონდენტების შერჩევა ბევრ კითხვას ბადებს. მაგალითად, ერთი მხრივ, მოწვეულები არიან ხელისუფლების წარმომადგენლები და მეორე მხარეს ყოველთვის ერთი და იგივე პირები არიან მოწვეული, დემაგოგები. შესაბამისად, მაყურებელი იღებს გადაუმუშავებელ ინფორმაციას და უჭირს, გაერკვეს, თუ რა ხდება რეალურად,"- განაცხადა ბიძინა ივანიშვილმა.
ამასთან, პრემიერ-მინისტრი მიიჩნევს, რომ "ვერც ერთმა ჟურნალისტმა და ექსპერტმა ვერ მოახერხა ღირსეულად შეეფასებინა მისი ბოლო ახსნა-განმარტება და ვერ ერთი ჟურნალისტისგან ვერ ნახა ობიექტურად გაეგოთ როგორ დაალაგა აზრი".
"თან საკუთარი ხელით დავწერე ისევე როგორც ჩემი პირველი წერილი პოლიტიკაში მოსვლამდე, ჩემი ხელით გავამზადე . მე არ გამოვირჩევი საუკეთესო ჟურნალისტიკით და წერით, მაგრამ შემიძლია აზრების ჩამოყალიბება. ასევე, ბოლო წერილში სული და გული ჩავდე, ყველაფერი განვმარტე და ლამის მოღალატის როლში გამომიყვანეს. გამარჯვებულები არ გარბიაბნ, დამარცხებულები გარბიან. სად გინახავთ გამარჯვებული რომ გაქცეულა?! არც ის გაგიაზრებიათ რა ვთქვი პოლიტიკასი მოსვლამდე, როდესაც ვთქვი, რომ 2-დან 3 წლამდე დავრჩებოდი პოლიტიკაში. ვისაც ანალიზის უნარი აქვს, ვისაც შეუძლია პროცესები გაიაზროთ, საოცრება მოვახდინეთ ყველა მიმართულებით,"- განაცხადა ბიძინა ივანიშვილმა.
