საქართველოს საგარეო საქმეთა მინისტრის მაია ფანჯიკიძის განცხადებით, პრეზიდენტ მიხეილ სააკაშვილის მიერ მთავრობისთვის დახმარების შეთავაზება საკმაოდ დაგვიანებულია, რადგან მისი პრეზიდენტობის ვადის დასრულებამდე დაახლოებით 1 თვეა დარჩენილი.
"ერთადერთი ინსტრუმენტი ჩვენ რაც გვაქვს, არის საერთაშორისო თანამეგობრობის მხარდაჭერის მობილიზაცია. ჩენ ამას ვაკეთებთ, ამას პირველ რიგში საგარეო საქმეთა სამინისტრო აკეთებს, მაგრამ ყველა დანარჩენი უწყებაც. ყველა დახმარება, რომელიც შეგვიძლია მივიღოთ, რა თქმა უნდა მისასალმებელია, თუმცა მე ვფიქრობ, რომ პრეზიდენტისგან თანამშრომლობის შესახებ შეთავაზება საკმაოდ გვიან მოდის. მხოლოდ ერთი თვე იქნება იგი პრეზიდენტი,"- განაცხადა მაია ფანჯიკიძემ.
ცნობისთვის, საქართველოს პრეზიდენტმა მიხეილ სააკაშვილმა ამერიკის შეერთებული შტატებიდან დაბრუნების შემდეგ ოკუპირებული ცხინვალის რეგიონის მიმდებარე სოფლებში განვითარებულ მოვლენებთან დაკავშირებით ისაუბრა და აღნიშნა, რომ მთავრობის ნებისმიერ ინიციატივას დაუჭერს მხარს, რომელიც ქვეყნის დეოკუპაციისკენ იქნება მიმართული.
"ბოლო თვეებში ჩვენ უფრო მეტ სახნავ-სათესზე და სასოფლო-სამეურნეო მიწებზე დავკარგეთ კონტროლი, ვიდრე 2008 წლის ცხელი ომის დროს ქურთაში და თამარაშენში. ეს ყველაფერი ისე მოხდა, რომ პრაქტიკულად ვერავინ გაიგო მსოფლიოში ამის შესახებ. ამიტომ ახლა არ არის ქიშპობის დრო, მე მზად ვარ, დავჯდე საქართველოს მთავრობასთან ერთად და ჩემს ხელთ არსებული ყველა რესურსი გამოვიყენო, მათ შორის საერთაშორისო. ჩვენ უნდა ვიმოქმედოთ, საერთაშორისო თანამეგობრობასთან ერთად, თუ როგორ შევაჩეროთ ჩვენი მიწების ასეთი ჩუმი და ძალიან საშიში ანექსია! ნებისმიერ ქმედებას დავუჭერ მხარს, რომელსაც საქართველოს მთავრობა გააკეთებს, რომელიც ამ ანექსიას შეაჩერებს. ახლა მოქმედების დროა, სწორედ ახლა მწყობრად და კოორდინებულად უნდა ვიმოქმედოთ! მთავარი გაკვეთილი არის ის, რომ, ძალა ერთობაშია, ჩვენ რუსეთის ამ მცოცავ ანექსიას აუცილებლად შევაჩერებთ",- განაცხადა მიხეილ სააკაშვილმა.
.
