თბილისის საკრებულოს თავმჯდომარის ირაკლი შიხიაშვილის განცხადებით ნაციონალური მოძრაობის წამომადგენელი დეპუტატის მამუკა ახვლედიანის მიერ საკრებულოს შენობასთან შეკრებილი მომიტინგეებისთვის მიცემული დაპირება იმის შესახებ, რომ ათი დღის ვადაში რიგგარეშე სხდომა გაიმართება საფუძველს მოკლებულია.
შიხიაშვილის თქმით მამუკა ახვლედიანს მსგავსი საკითხების დაყენება მისი ფრაქციის შიგნით შეუძლია, თავად კი ამის აუცილებლობას ვერ ხედავს.
ამასთან ირაკლი შიხიაშვილი საკრებულოსთან დღეს გამართული აქციის მონაწილეებს ნაიცონალური მოძრაობის მიერ მართულებს უწოდებს და აცხადებს, რომ თბილისის კორპუსის თითო თავმჯდომარეს ოცდაათი მომიტინგის შეკრება დაევალა.
„დღეს კიდევ ერთხელ გამოჩნდნენ თუ ვინ არიან ეს ადამიანები, მათი ნაწილი ნაციონალურ მოძრაობას წარმოადგენს და დიდი ზეწოლის შედეგად არიან მოყვანილები. თითო ხელმძღვანელს ავალებდნენ, რომ 30 კაცი მოეყვანათ, მე რამდენადაც მოვისმინე, მამუკა ახვლედიანს უთქვამს მოსახლეობისთვის, რომ გაიმართება რიგგარეშე სხდომა. ეს საკითხები ბატონ მამუკას შეუძლია დააყენოს ფრაქციის შიგნით მაგრამ ამის აუცილებლობას მე ვერ ვხედავ , ვინაიდან საკრებულოს წესში ცვლილებების შეტანა მოხდება მხოლოდ მაშინ, როცა გვექნება ახალი წესი, ამის შემდეგ განვსაზღვრათ ამ წესით წახალისებისთვის რა თანხები იქნება საჭირო და მას შემდეგ მოხდება ცვლილებები ბიუჯეტში", - განაცხცადა ირაკლი შიხიაშვილმა და დასძინა, რომ 27 ოქტომბრამდე ბიუჯეტში ცვლილებების შეტანა შეუძლებელია.
„27 ოქტომბრამდე ბიუჯეტში ცვლილება არ მოხდება, წესის გამოცხადება შეიძლება მოხდეს უფრო ადრე, მაგრამ ბიუჯეტში ცვლილებას კანონი კრძალავს და არა შიხიაშვილი". დასძინა შიხიაშვილმა.
რაც შეეხება თბილისის მერის გიგი უგულავას დღევანდელ განცხადებებს, შიხიაშვილის თქმით „უგულავამ კოჭის გაგორება სააკაშვილისგან ისწავლა და შეუძლია წითელი და ლურჯი კოჭები აგოროს".
საკრებულოს თავმჯდომარე, დედაქალაქის მერს გიგი უგულავას მოუწოდებს უკმაყოფილო მოსახლეობით მანიპულირება შეწყვიტოს და პრობლემური საკითხების გადასაწყვეტად კონსტრუქციულ დებატებში მიიღოს მონაწილეობა.
„თუ უგულავას ერთი არგუმენტი მაინც ექნება იმის სათქმელად, რატომ არ მოვა დეპატებზე, მე ხმას არ ამოვიღებ და თუ ის არის თბილისი მერი და მე საკრებულოს თავმჯდომარე შეწყვიტოს ეს მასკარადი, შეწყვიტოს, მანიპულირება, რადგან ამ მანიპულირებით საზოგადოებაში დაპირისპირების გაჩენას ცდილობს. მიიღოს მონაწილეობა დეპატებში და გამოჩნდება ვინ ზრუნავს რეალურად ქალაქზე" დასძინა შიხიაშვილმა.
