თბილისის საკრებულოს წევრების გადაწყვეტილებით უახლოეს ათ დღეში რიგგარეშე სხდომა გაიმართება, რომელზეც ბინათმესაკუთრეთა ამხანაგობების პროექტების დაფინანსებასთან დაკავშირებით საკითხებზე იმსჯელებენ. როგორც თბილისის საკრებულოს წევრმა მამუკა ახვლედიანმა დედაქალაქის საკრებულოს შენობასთან შეკრებილ მომიტინგეებს განუცხადა ქალაქის მერი გიგი უგულავა აღნიშნული პროექტების გასაგრძელებლად შესაბამის საბიუჯეტო დაფინანსებას გამოყოფს, გარდა ამისა თბილისის საკრებულოში წარმოდგენილი ნაციონალური მოძრაობის წევრი დეპუტატები ბოლომდე იბრძოლებენ და შეეცდებიან დედაქალაქის მოსახლეობისთვის სასარგებლო ყველა პროექტისთვის შესაბამისი ფინანსური რესურსები გამოძებნონ.
მამუკა ახვლედიანის აღნიშნული მიმართვის შემდეგ, თბილისის საკრებულოსთან შეკრებილმა მომიტინგეებმა დაშლის გადაწყვეტილება მიიღეს, ამ წუთებში ადგილზე სიტუაცია განიმუხტა. რაც შეეხება საკრებულოს შენობაში მიმდინარე სხომას დეპუტატებმა დღის წესრიგით გათვალისწინებულ შვიდ საკითხზე იმსჯელეს და სხდომა დასრულებულია.