საქართველოს დელეგაციას ხელმძღვანელობდა საგარეო საქმეთა მინისტრი მაია ფანჯიკიძე. ევროკავშირის მხრიდან შეხვედრას ასევე ესწრებოდნენ ევროკომისარი გაფართოებისა და ევროპული სამეზობლო პოლიტიკის დარგში შტეფან ფულე, ევროპული საგარეო ქმედებათა სამსახურის გენერალური მდივნის მოადგილე ჰელგა შმიდი და ევროკავშირის საბჭოს თავმჯდომარე ქვეყნის, ლიტვის საგარეო საქმეთა მინისტრი ლინას ლინკიავიჩიუსი.
შეხვედრაზე განხილულ იქნა ყველა პარტნიორი ქვეყნის მიერ დასახული მიზნები და მოლოდინები ვილნიუსის სამიტის კონტექსტში. ქეთრინ ეშტონის, შტეფან ფულესა და ლინას ლინკიავიჩიუსის მიერ აღინიშნა, რომ ევროკავშირი მხარს უჭერს სამიტზე უკრაინასთან ასოცირების შესახებ შეთანხმების ხელმოწერას, ხოლო საქართველოსა და მოლდოვასთან - მის პარაფირებას. ასევე, შტეფან ფულემ ხაზი გაუსვა ევროკომისიის მიერ, მაქსიმალურ მცდელობათა განხორციელების აუცილებლობას, ამჟამინდელი ევროკომისიის მანდატის ამოწურვამდე საქართველოსა და მოლდოვასთან ასოცირების შესახებ შეთანხმებების ხელმოწერის მიზნით.
"შეხვედრაზე კიდევ ერთხელ შევაჯამეთ მიღწეული შედეგები ვილნიუსის სამიტის წინ. ძალზედ მკაფიო განცხადებები გაკეთდა იმის თაობაზე, რომ უკრაინა ხელს მოაწერს ასოცირების ხელშეკრულებას, ხოლო მოლდოვა და საქართველო მოახდენენ ხელშეკრულების პარაფირებას, ევროკომისიის ვადის ამოწურვამდე ხელი მოეწერება მოლდოვასა და საქართველოსთან ასოცირების ხელშეკრულებას. ეს ფაქტი ძალზედ მნიშვნელოვანია, რადგან ამ ყველაფრის უკან დგას უდიდესი შრომა", - განაცხადა საქართველოს საგარეო საქმეთა მინისტრმა მაია ფანჯიკიძემ.