„საქართველოს სტრატეგიული კვლევების და განვითარების ცენტრმა" „მომხმარებელთა უფლებების შესახებ" კანონპროექტის ხელშემწყობი კამპანია წარადგინა. ირკვევა, რომ ცენტრი სახელმწიფო უწყებებისა და არასამავრობო ორგანიზაციების წარმომადგენლებთან ერთად იწყებს ლობირების კამპანიას კანონზე "მომხმარებელთა უფლებების შესახებ". კამპანია მოიცავს კანონპროექტის იურიდიულ და დარგობრივ ექსპერტიზასა და რეკომენდაციებს, რათა მოხდეს ისეთი კანონის შემუშავება, რომელიც ევროპული სტანდარტების შესაბამისი იქნება.
„საქართველოს სტრატეგიული კვლევების და განვითარების ცენტრი" შექმნის შესაბამის საინფორმაციო-განმარტებით მასალებს, რომელიც მომხმარებელი.ჯი-ს ვებ-გვერდზე განთავსდება და საზოგადოებას მიაწვდის ინფორმაციას კანონპროექტზე მუშაობის დეტალებზე. იგეგმება შეხვედრა-კონსულტაციები აღმასრულებელ და საკანონმდებლო ხელისუფლებაში გადაწყვეტილების მიმღებებ პირებთან.
„მომხმარებელთა დაუცველობა უარყოფითად მოქმედებს ქვეყანაში თავისუფალი ბიზნეს გარემოს განვითარებაზეც. შესაბამისად, კანონმა ბიზნესის განვითარებასა და კეთილსინდისიერი მეწარმეების დაცვასაც უნდა შეუწყოს ხელი. გარდა ამისა, უნდა უზრუნველყოს მომხმარებელთა დახმარების ადმინისტრაციული ორგანოს შექმნა,
რომელიც გააკონტროლებს, რომ მეწარმეებმა არ დაარღვიონ მოქალაქეთა უფლებები.
მომხმარებელთა უფლებების დასაცავად არ არსებობს შესაბამისი სახელმწიფო პოლიტიკა, სუსტი იყო 1995 წლის მომხმარებელთა უფლებების დაცვის კანონი, რომელსაც არ ახლდა პირველ რიგში განხორციელების მექანიზმი. 2012 წელს კი ეს კანონი საერთოდ გაუქმდა. ამჟამად მომხმარებელთა დაცვის ინსტიტუციები ცალკეული სფეროების ფარგლებში მოქმედებს და ისიც მხოლოდ შეზღუდული პირობებით და ფორმატით"- განმარტავენ „საქართველოს სტრატეგიული კვლევების და განვითარების ცენტრში".
2012 წლის დეკემბრიდან საქართველოს პარლამენტის ევროპული ინტეგრაციის კომიტეტის ინიციატივით და ლიდერობით დაიწყო მომხმარებელთა დაცვის ახალი კანონის შემუშავება. ამ მიზნით შეიქმნა სამუშაო ჯგუფი, რომელშიც პარლამენტარების გარდა მოწვეული იქნა სხვადასხვა სამინისტროს წარმომადგენლები, არასამთავრობო სექტორი და მათ შორის ჩართულია „საქართველოს სტრატეგიული კვლევების და განვითარების ცენტრი".
პროექტი 6 თვეს გაგრძელდება და დაფინანსებულია ფონდ "ღია საზოგადოება - საქართველოს" მიერ.
