"ქართული ოცნების" პრეზიდენტობის კანდიდატი, გიორგი მარგველაშვილი წინასაარჩევნო შეხვედრები იმერეთის რეგიონში მართავს.
"ქართული ოცნების" პრესსამსახურის ინფორმაციით, მარგველაშვილი ხონისა და სამტრედიის რაიონებს ესტუმრა და მოსახლეობას საპრეზიდენტო პროგრამა გააცნო. კოალიციის კანდიდატი ამომრჩევლებს ენერგეტიკისა და ბუნებრივი რესურსების მინისტრმა კახი კალაძემ და განათლებისა და მეცნიერების მინისტრმა თამარ სანიკიძემ წარუდგინეს. მოსახლეობასთან შეხვედრას საქართველოს პარლამენტის წევრები მანანა კობახიძე, ეკა ბესელია, ოთარ ჩრდილელი, ელისო ჩაფიძე, ზვიად ძიძიგური და გიორგი კახიანი ესწრებოდნენ.
კოალიციის პრეზიდენტობის კანდიდატმა შეკრებილ მოსახლეობას სიტყვით მიმართა და პრობლემების მოგვარებას დაჰპირდა. "27 ოქტომბერს ჩვენ ყველა აქტიურად მივალთ საარჩევნო უბნებზე, შევცვლით პრეზიდენტს და იმ პირებს, რომლებიც ცდილობენ, რომ ის მცირე სიკეთე, რაც ჯერჯერობით არსებობს, არ მივიდეს ხალხამდე", - აღნიშნა გიორგი მარგველაშვილმა.
სამტრედიაში შეხვედრის დასრულების შემდეგ, წინასაარჩევნო კამპანია ჟურნალისტებთან განათლებისა და მეცნიერების მინისტრმა თამარ სანიკიძემ და ენერგეტიკისა და ბუნებრივი რესურსების მინისტრმა კახი კალაძემაც შეაფასეს.
"გიორგი მარგველაშვილს აქვს დიდი მხარდაჭერა. კოალიციამ წარადგინა არაჩვეულებრივი კანდიდატი. ზუსტად ვიცი, რომ საქართველოს უნდა ჰყავდეს ასეთი პრეზიდენტი, რომელსაც არ აქვს ძალაუფლების ინტერესი, არამედ მისი სამშობლოს სიყვარული ამოძრავებს", - განაცხადა განათლებისა და მეცნიერების მინისტრმა.
კახი კალაძემ კიდევ ერთხელ დაადასტურა საკუთარი მხარდაჭერა კოალიციის კანდიდატის მიმართ. "27 ოქტომბერს იქნება თითოეული ჩვენგანის, თითოეული ქართველის გამარჯვება, რომელიც დაწყებულია "ქართული ოცნების" მიერ და ეს იქნება დამაგვირგვინებელი. გიორგი მარგველაშვილი აუცილებლად გახდება საქართველოს პრეზიდენტი", - აღნიშნა კახი კალაძემ.
კოალიციის კანდიდატი გიორგი მარგველაშვილი წინასაარჩევნო კამპანიის ფარგლებში ხვალ ჭიათურისა და საჩხერის რაიონებს ესტუმრება.
