საგარეო საქმეთა საქმეთა მინისტრის მაია ფანჯიკიძის განცხადებით საქართველო მხარს უჭერს საზოგადოების მზადყოფნას აქტიური როლი შეასრულოს სირიაში ჰუმანიტარული კატასტროფის დაძლევის საქმეში. როგორც ჟურნალისტებთან ფანჯიკიძემ სირიაში მიმდინარე პროცესების კომენტირებისას განაცხადა ქართული მხარე გმობს სამოქალაქო პირების მიმართ განხორციელებულ ძალადობას, რომელსაც ასი ათასზე მეტი ადამიანის სიცოცხლე ემსხვერპლა.
"საქართველო გმობს სირიაში სამოქალაქო პირების მიმართ განხორციელებულ ძალადობას, რომელსაც ასი ათასზე მეტი ადამიანის სიცოცხლე ემსხვერპლა. ამ ძალადობის კულმინაცია იყო ქიმიური იარაღის გამოყენება, რაც წარმოადგენს საერთაშორისო ჰუმანიტარული სამართლის უხეშ დარღვევას. სირიაში მიმდინარე კრიზისის განმავლობაში საქართველო ყოველთვის მხარს უჭერდა საერთაშორისო თანამეგობრობის მიდგომებსა და ინიციატივებს, მათ შორის გაეროსა და არაბთა ლიგის ერთობლივი წარმომადგენლის მისიას და გენერალური ასამბლეის რეზოლუციებს, რომლებიც მოუწოდებდნენ სირიაში ადამიანის უფლებების დაცვისა და პოლიტიკური ტრანზიციისკენ", - განაცხადა მაია ფანჯიკიძემ.
საგარეო საქმეთა მინისტრის თქმით, საქართველო მიესალმება და მხარს უჭერს საერთაშორისო საზოგადოების მზადყოფნას უფრო აქტიური როლი შეასრულოს სირიაში ჰუმანიტარული კატასტროფის დაძლევის საქმეში და რეჟიმმა, რომელმაც ჩაიდინა დანაშაული, პასუხი აგოს ამ ფუნდამენტური საერთაშორისო ჰუმანიტარული ნორმის დარღვევისთვის.
შეგახსენებთ, დასავლეთის ქვეყნები ირწმუნებიან, რომ ოფიციალურმა დამასკომ 21 აგვისტოს ქიმიური იარაღის გამოყენებით ასობით მშვიდობიანი მოქალაქე დახოცა. დამასკო ამ ბრალდებას უარყოფს და თავის მხრივ აცხადებს, რომ ქიმიური იარაღი ამბოხებულებმა გამოიყენეს. იგივე პოზიციას აჟღერებს ოფიციალური მოსკოვიც. დამასკოში ამჟამად გაეროს ექსპერტები მუშაობენ, რომლებიც თავიანთ დასკვნას გაეროს გენერალურ მდივანს წაუდგენენ. დიდმა ბრიტანეთმა უარი განაცხადა სამხედრო ოპერაციაში მონაწილეობაზე. ხოლო აშშ კვლავინდებურად აპირებს სირიის წინააღმდეგ სამხედრო ოპერაციის ჩატარებას, მასში დიდ ბრიტანეთის მონაწილეობის გარეშეც. ობამა მიჩნევს, რომ სირიის კონფლიქტში დაირღვა ქიმიური იარაღის გამოყენების საერთაშორისო ნორმები და შესაბამისმა პირებმა პასუხი უნდა აგონ.