ჟურნალისტი ირმა ინაშვილი საკანონმდებლო ორგანოს უზენაესი სასამართლოს თავმჯდომარის კოტე კუბლაშვილის იმპიჩმენტის პროცედურის დაწყებისკენ მოუწოდებს. როგორც ინაშვილმა "პრაიმ ტაიმის" პრესკლუბში სტუმრობისას განაცხადა, ამ მიზნით, 1-ელ სექტემბერს უზენაეს სასამართლოსთან წითელი ბარათების საპროტესტო აქცია გაიმართება.
"პირველ სექტემბერს 15:00 საათზე, უზენაეს სასამართლოსთან ე.წ. წითელი ბარათების საპროტესტო აქცია გაიმართება. აქციის მოთხოვნაა საქართველოს პარლამენტმა, რომელიც ამ ხნის მანძილზე პრეზერვატივების საკითხის განხილვით იყო დაკავებული, დაიწყოს კოტე კუბლაშვილის იმპიჩმენტის პროცედურაზე მუშაობა. მე მოვუწოდებ მეტი აქტიურობისკენ სამოქალაქო საზოგადოებას. ბატონი კუბლაშვილი პოლიტიკური კრიმინალია. ქვეყანაში სადაც იყო უამრავი პოლიტპატიმარი, როგორ შეიძლება ვამბობდეთ, რომ არსებობდა უზენაესი სასამართლოს რეფორმატორი, თავმჯდომარე", _განაცხადა ინაშვილმა.