"ბოლო დროს ნიგვზიანში, წინწყაროსა და სამთაწყაროში მუსლიმების მიმართ განხორციელებული ძალადობის ფაქტებზე სრული უმოქმედობის შემდეგ, საქართველოს ფინანსთა სამინისტროს შემოსავლების სამსახურმა მოახერხა და ადიგენის რაიონის სოფელ ჭელაში აბსურდულიმოტივით მინარეთის დემონტაჟით იმგვარი უგუნურება ჩაიდინა, რომ უმრავლესობის ერთ-ერთმა წევრმა გედევან ფოფხაძემაც კი აღიარა, ამ ადამიანებს პრობლემები აქვთ ინტელექტთანო. მან უბრალოდ არ დააზუსტა, რომ ამ ადამიანების ჯგუფს დღეს საქართველოს მთავრობა ეწოდება. იუსტიციის მინისტრის შემაშფოთებელი განცხადების შემდეგ კიდევ ერთხელ დადასტურდა, რომ მინარეთის დემონტაჟი მთავრობის პოლიტიკური გადაწყვეტილება იყო. სამწუხაროა, რომ დღეს გვჭირდება იმ სიტყვების გამეორება, რასაც ჩვენი გამოცდილების ხალხი ზურგის ტვინით უნდა გრძნობდეს, მაგრამ ამ ფონზე კიდევ ათასჯერ უნდა გავიმეოროთ, რომ არა უბრალოდ შემწყნარებლობა, არამედ განსხვავებული რელიგიების მიმართ პატივისცემა იყო თანამედროვე ქართული ეროვნული იდეის დამფუძნებელი მამების - ილიას, აკაკისა და ვაჟას მთავარი ღირებულება. ყოველმა „ტრადიციონალისტმა", რომელიც დღეს „ქართული ტრადიციების" დასაცავად განსხვავებული რწმენის თანამოქალაქეებზე ძალადობს, უნდა იცოდეს, რომერთადერთი ტრადიცია, რასაც ის იცავს, არის რწმენის თავისუფლების შეზღუდვისა და მორწმუნეთა დევნის საბჭოთა ტრადიცია. სწორედ ამიტომ, დღეს შექმნილი ვითარების გათვალისწინებით, ყოველ მეჩეთს უნდა იცავდეს წარწერა ილიას სიტყვებით: სარწმუნოების სხვა-და-სხვაობა ჩვენ არ გვაშინებს. ქართველმა თავისი სარწმუნოებისთვის ჯვარცმულმა, იცის პატივი სხვის სარწმუნოებისაც. არ გვაშინებს მეთქი ჩვენ ის გარემოება, რომ ჩვენ ძმას, დღეს მაჰმადიანის სარწმუნოება უჭირავთ, ოღონდ მოვიდეს კვლავ ის ბედნიერი დღე, რომ ჩვენ ერთმანეთს კიდევშევუერთდეთ, ერთმანეთი ვიძმოთ, და ქართველი, ჩვენდა სასიქადულოდ, კვლავ დაუმტკიცებს ქვეყანასა, რომ იგი არ ერჩის ადამიანის სინდისს. სამწუხაროდ, დღეს შეიქმნა ვითარება, როდესაც ჩვენმა მუსლიმმა თანამოქალაქეებმა უნდა შეახსენონ ზოგიერთ ჩვენგანს და მთავრობას ეს სიტყვები, რადგან საბჭოთა ტრადიციამ ამ მოწოდების ყოველი სიტყვა ამოატრიალა და დღეს არაერთი ქართველის სულისკვეთება შემდეგნაირად იკითხება: სარწმუნოების სხვადასხვაობა ჩვენ გვაშინებს. ქართველს, 70 წლიანმა მებრძოლი ათეისტურმა ეპოქამ ასწავლა სხვის რწმენის უპატივისმცემლობა. ჩვენ გვაშინებს ის გარემოება, რომჩვენ ძმას, დღეს მაჰმადიანის სარწმუნოება უჭირავს, მიუხედავად იმისა, რომ ჩვენ ერთმანეთს უკვე საუკუნეზე მეტია რაც შევუერთდით, ერთმანეთი ვიძმეთ, ჩვენდა სამარცხვინოდ, გვინდა მთელს ქვეყანას დავანახოთ, რომ ქართველი ერჩის ადამიანის სინდისს,"- ნათქვამია სერგო რატიანის განცხადებაში.

ცნობისთვის, ადიგენის რაიონის სოფელ ჭელაში მუსლიმთა სამლოცველოს მინარეთის დემონტაჟი 26 აგვისტოს მოხდა. აღნიშნული გადაწყვეტილება ფინანსთა სამინისტროს შემოსავლების სამსახურმა მინარეთის რკინის კონსტრუქციის იმპორტირებისას საბაჟო პროცედურების დარღვევით ახსნა. მინარეთის დემონტაჟს საქართველოში მცხოვრები მუსლიმი მოსახლეობის პროტესტი მოჰყვა და აჭარის მეჩეთთან სხვადასხვა რეგიონიდან ჩასულმა ათასობით მუსლიმმა საპროტესტო აქცია გამართა. საბოლოოდ, აჭარის ავტონომიური რესპუბლიკის მთავრობის თავმჯდომარის არჩილ ხაბაძის შუამდგომლობით, ჭელაში მინარეთის დაბრუნება დღეს საღამოს 19:00 საათისთვის გადაწყდა. აღნიშნული გადაწყვეტილები გასაპროტესტებლად ადგილობრივმა მართლმადიდებელმა მოსახლეობამ ახალციხიდან ჭელასკენ მიმავალი ცენტრალური მაგისტრალი გადაკეტა. მათი თქმით, ისინი მინარეთის აღდგენას არ დაუშვებენ. საპროტესტო აქციაში სასულიერო პირებიც მონაწილეობენ და მომიტინგეთა მოთხოვნებს სრულად იზიარებენ.

აღნიშნულ საკითხზე საპატრიარქოში გამართულ შეხვედრაზე ადიგენის რაიონის სოფელ ჭელაში მდებარე მუსლიმთა სამლოცველოს მინარეთის კონსტრუქციის საკანონმდებლო ბაზის მოწესრიგებამდე დალუქვის და დასაწყობების გადაწყვეტილება იქნა მიღებული.

შეხვედრას სრულიად საქართველოს კათოლიკოს პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი ილია მეორე, სხვა მართლმადიდებელი სასულიერო პირები და მუსლიმი საზოგადოების წარმომადგენელი მუფტები ესწრებოდნენ. ამასთან, საქართველოს საპატრიარქო აბსოლუტურად ეთანხმება ადიგენის რაიონის სოფელ ჭელაში განვითარებულ მოვლენებზე მართლმადიდებელი მრევლის სამართლიან პროტესტს.