როგორც სალომე ზურაბისვილმა შეხვედრის დასრულების შემდეგ განაცხადა, დიმიტროვთან საუბრის მთავარი თემა 2013 წლის 27 ოქტომბრის საპრეზიდენტო არჩევნებში მისი მონაწილეობა და ამისთვის არსბული შესაბამისი საკანონმდებლო ბაზა იყო.

"მე მივაწოდე სრული ინფორმაცია იმის შესახებ, რაზედაც ადრე ვილაპარაკეთ. სხვათა შორის, არაფრის ახსნა არ დამჭირვებია, იმიტომ, რომ თვითონ იურისტია და ძალიან კარგად ჰქონდა წაკითხული კონსტიტუცია და არანაირი დამატებითი კითხვები არ ჰქონდა. იგი სრულად იზიარებს იმ აზრს, რომ კონსტიტუცია არის ნათელი და არაფერს სხვას არ მოითხოვს. დანარჩენი რაც აქვს ამ თემაზე სათქმელი, ალბათ თვითონ იტყვის, მე არ შემიძლია ვილაპარაკო მის მაგივრად, მაგრამ ამ შეხვედრით ძალიან კმაყოფილი ვარ. მესმის, რომ საერთაშორისო საზოგადოება ძალიან ახლოდან აკვირდება ამ სიტუაციას და არის ძალიან დაინტერესებული. ყველამ ვიცით, რომ წლის ბოლოსთვის ვილნიუსის სამიტი მზადდება, რომელიც საქართველოსთვის უნდა იყოს წინ გადადგმული ნაბიჯი და საპრეზიდენტო არჩევნები და მისი სამართლიანად ჩატარება ამ განხილვისთვის ერთ-ერთი მნიშვნელოვანი კომპონენტია,"- განაცხადა სალომე ზურაბიშვილმა.

დღესვე სალომე ზურაბიშვილი საქართველოში ამერიკის შეერთებული შტატების ელჩს რიჩარდ ნორლანდს და საქართველოს უმაღლესი საკანონმდებლო ორგანოს თავმჯდომარე დავით უსუფაშვილს შეხვდება. ამის შემდეგ კი, უკვე ორშაბათს, ზურაბიშვილი ცენტრალურ საარჩევნო კომისიას საპრეზიდენტო კანდიდატად მისი დარეგისტრირების თაობაზე ოფიციალური განაცხადით მიმართავს.